କଳାପଥର(ବାଙ୍କୀ): ବ୍ଲକ ସମ୍ମିଳନୀ କକ୍ଷରେ ବାଙ୍କୀ ବିଧାୟକ ଦେବୀରଞ୍ଜନ ତ୍ରିପାଠୀ ଉପଖଣ୍ଡସ୍ତରୀୟ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଛନ୍ତି । ଏଥିରେ ଉପଖଣ୍ଡସ୍ତରୀୟ ସମସ୍ତ ବିଭାଗର ଅଧିକାରୀମାନେ ଯୋଗଦେଇଥିଲେ । ବିଧାୟକ ପ୍ରାରମ୍ଭରେ ସମସ୍ତଙ୍କୁ ସ୍ୱାଗତ ଜଣାଇବା ସହିତ ସମସ୍ତ ବିଭାଗୀୟ ଅଧିକାରୀମାନେ ବାଙ୍କୀ ଜନସାଧାରଣଙ୍କ ଉନ୍ନତି ପାଇଁ ନିଜର କାର୍ଯ୍ୟକୁ ଯେପରି ସୂଚାରୁରୂପେ ସମ୍ପାଦନ କରିବେ ସେଥିପାଇଁ ପରାମର୍ଶ ଦେଇଥିଲେ । ସ୍ୱାସ୍ଥ୍ୟ, ଶିକ୍ଷା, କୃଷି, ଉଦ୍ୟାନ, ପଶୁସମ୍ପଦ, ଜଳସମ୍ପଦ ଆଦି ବିଭାଗ ସମ୍ପର୍କରେ କାର୍ଯ୍ୟଖସଡା ପ୍ରସ୍ତୁତି ନେଇ ବିଭାଗୀୟ ଅଧିକାରୀମାନଙ୍କ ଠାରୁ ସମସ୍ତ କାର୍ଯ୍ୟର ବିବରଣୀ ଓ ଭବିଷ୍ୟତରେ ହେବାକୁ ଥିବା ବିଭିନ୍ନ ଉନ୍ନୟନମୂଳକ ପ୍ରକଳ୍ପ ସଂପର୍କରେ ପଚାରି ବୁଝିଥିଲେ । ବିଶେଷକରି ଉପଖଣ୍ଡ ଚିକିତ୍ସାଳୟ ତଥା ଉପଖଣ୍ଡର ଅନ୍ୟାନ୍ୟ ଚିକିତ୍ସାଳୟଗୁଡିକର ଭିତ୍ତିଭୂମି ସୁଦୃଢ଼ କରିବା, ରୋଗୀମାନଙ୍କୁ ଉନ୍ନତମାନର ସ୍ୱାସ୍ଥ୍ୟସେବା ଯୋଗାଇ ଦେବା, ଭିନ୍ନକ୍ଷମମାନଙ୍କ ସଶକ୍ତୀକରଣ, ମହିଳା ଓ ଶିଶୁବିକାଶ ପ୍ରକଳ୍ପ ଗୁଡିକର କାର୍ଯ୍ୟକାରିତା, ଚାଷୀମାନଙ୍କୁ ଫସଲ ବୀମା ଓ ଧାନମଣ୍ଡି, ସରକାରୀ ଯୋଜନାଗୁଡ଼ିକର ସୁବିଧା ଗୁଡିକ ସଂପର୍କରେ ଆଲୋଚନା କରିଥିଲେ। ଛାତ୍ରଛାତ୍ରୀମାନଙ୍କ ଗୁଣାତ୍ମକ ଶିକ୍ଷା ସଂପର୍କରେ ବିଧାୟକ ଗୁରୁତ୍ୱାରୋପ କରିଥିଲେ । କାର୍ଯ୍ୟକାରୀ ହୋଇ ନ ଥିବା ଉନ୍ନୟନମୂଳକ ପ୍ରକଳ୍ପଗୁଡିକ ଯେପରି ଠିକ୍ ସମୟରେ ସମାପ୍ତ ହେବ ସେଥିପାଇଁ ଅଧିକାରୀମାନଙ୍କୁ ବିଧାୟକ ନିର୍ଦ୍ଦେଶ ଦେଇଥିଲେ । ଉପଜିଲ୍ଲାପାଳ ଦେବୀପ୍ରସାଦ ମହାନ୍ତି କାର୍ଯ୍ୟକ୍ରମ ପରିଚାଳନା କରିବା ସହିତ ଧନ୍ୟବାଦ ଅର୍ପଣ କରିଥିଲେ।
Comments are closed.