ନୂଆଦିଲ୍ଲୀ: ଭାରତ ସହିତ ହୋଇଥିବା ଏକ ବୁଝାମଣାକୁ ଉଲ୍ଲଂଘନ କରି ପାକିସ୍ତାନ ଭୁଲ କରିଥିଲା ବୋଲି ସ୍ୱୀକାର କରିଛନ୍ତି ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ। ପାକିସ୍ତାନ ମୁସଲିମ ଲିଗ୍-ନୱାଜ (ପିଏମଏଲ-ଏନ)ର ଅଧ୍ୟକ୍ଷ ଭାବେ ନିର୍ବାଚିତ ହେବା ପରେ ଏକ ବୈଠକରେ ଭାରତ-ପାକ୍ ସମ୍ପର୍କ ଉପରେ ମତଦେଇ ସେ ଏହା କହିଛନ୍ତି।
ନୱାଜ କହିଥିଲେ, ୧୯୯୮ ମେ ୨୮ରେ ପାକିସ୍ତାନ ୫ଟି ପରମାଣୁ ପରୀକ୍ଷଣ କରିଥିଲା। ଏହା ପରେ ଭାରତର ତତ୍କାଳୀନ ପ୍ରଧାନମନ୍ତ୍ରୀ ସ୍ୱର୍ଗତ ଅଟଳ ବିହାରୀ ବାଜପେୟୀ ପାକିସ୍ତାନ ଆସିଥିଲେ। ଏହି ଅବସରରେ ଏକ ଚୁକ୍ତି ସ୍ୱାକ୍ଷରିତ ହୋଇଥିଲା। ଆମେ ସେହି ଚୁକ୍ତିକୁ ଉଲ୍ଲଂଘନ କଲୁ। ଏହା ଆମର ସବୁଠୁ ବଡ଼ ଭୁଲ ଥିଲା। ସୂଚନାଯୋଗ୍ୟ, ୧୯୯୯ ଫେବୃୟାରୀ ୨୧ରେ ଭାରତ ଏବଂ ପାକିସ୍ତାନ ମଧ୍ୟରେ ଲାହୋରଠାରେ ଏକ ଚୁକ୍ତି ସ୍ୱାକ୍ଷରିତ ହୋଇଥିଲା, ଯେଉଁଥିରେ ବାଜପେୟୀ ଦସ୍ତଖତ କରିଥିଲେ। ଏହାକୁ ଲାହୋର ଚୁକ୍ତି ବୋଲି ମଧ୍ୟ କୁହାଯାଉଥିଲା। ଦୁଇ ଦେଶ ମଧ୍ୟରେ ଶାନ୍ତି ଏବଂ ସ୍ଥିରତା ବଜାୟ ରଖିବା ଉଦ୍ଦେଶ୍ୟରେ ଏହି ଚୁକ୍ତି ହୋଇଥିଲା। ମାତ୍ର କିଛି ମାସ ପରେ ପାକିସ୍ତାନ ତରଫରୁ ସୀମାରେ ଅନୁପ୍ରବେଶକୁ ପ୍ରୋତ୍ସାହିତ କରାଯାଇଥିଲା। ଏହି କାରଣରୁ କାରଗିଲ ଯୁଦ୍ଧ ହୋଇଥିଲା।
ନୱାଜ ବୈଠକରେ ପାକ୍ର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କୁ ବି ଟାର୍ଗେଟ କରିଥିଲେ। ସେ କହିଥିଲେ, ଆମେରିକାର ପୂର୍ବତନ ରାଷ୍ଟ୍ରପତି ବିଲ୍ କ୍ଲିଣ୍ଟନ ପରମାଣୁ କାର୍ଯ୍ୟକ୍ରମ ରୋକିବା ପାଇଁ ୫୦୦ କୋଟି ଡଲାର ଯାଚିଥିଲେ, ଯାହାକୁ ସେ ପ୍ରତ୍ୟାଖ୍ୟାନ କରିଥିଲେ। କିନ୍ତୁ ସେହି ସ୍ଥାନରେ ଯଦି ଇମ୍ରାନ ଥାଆନ୍ତେ, ତେବେ ସେ କ୍ଲିଣ୍ଟନଙ୍କ କଥାରେ ରାଜି ହୋଇଯାଇଥାଆନ୍ତେ।
