ଡେରାଡୁନ: ଚଳିତମାସ ୧୦ରୁ ଉତ୍ତରାଖଣ୍ଡରେ ଚାର୍ଧାମ ଯାତ୍ରା ଆରମ୍ଭ ହୋଇଛି। ଏହି ଅବସରରେ ଶ୍ରଦ୍ଧାଳୁ ରାଜ୍ୟର ପ୍ରମୁଖ ଚାରିଟି ଧାର୍ମିକ ସ୍ଥାନ ଯଥା ବଦ୍ରିନାଥ, କେଦାରନାଥ, ଗଙ୍ଗୋତ୍ରୀ ଓ ଯମୁନେତ୍ରୀ ମନ୍ଦିର ପରିଦର୍ଶନ କରିଥାନ୍ତି। ତେବେ ବିଗତ ଦୁଇ ସପ୍ତାହ ମଧ୍ୟରେ ୫୨ ଜଣ ଶ୍ରଦ୍ଧାଳୁ ପ୍ରାଣ ହରାଇଛନ୍ତି ବୋଲି ଗଡୱାଲ କମିସନର ବିଜୟ ଶଙ୍କର ପାଣ୍ଡେ ଶନିବାର ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ମୃତକଙ୍କ ମଧ୍ୟରେ ଅଧିକାଂଶ ବୟସ୍କ ନାଗରିକ ଥିବାବେଳେ ସେମାନେ ହୃଦଘାତରେ ପ୍ରାଣ ହରାଇଥିବା କୁହାଯାଇଛି। କେଦାରନାଥରେ ସର୍ବାଧିକ ୨୩ ଶ୍ରଦ୍ଧାଳୁଙ୍କର ମୃତ୍ୟୁ ଘଟିଥିବାବେଳେ ଗଙ୍ଗୋତ୍ରୀ, ଯମୁେନତ୍ରୀ ଓ ବଦ୍ରିନାଥରେ ଏହି ସଂଖ୍ୟା ଯଥାକ୍ରମେ ୩, ୧୨ ଓ ୧୪ ରହିଛି। ପୁନଶ୍ଚ ଏହି ଦୁଇ ସପ୍ତାହ ମଧ୍ୟରେ ୯ ଲକ୍ଷ ୬୭ ହଜାର ଶ୍ରଦ୍ଧାଳୁ ଚାର୍ଧାମ ଯାତ୍ରା କରିସାରିଥିବା ପାଣ୍ଡେ ସୂଚନା ଦେଇଛନ୍ତି। ଏହି ପ୍ରସଙ୍ଗରେ ଉତ୍ତରାଖଣ୍ଡ ସରକାର କଡା ପଦକ୍ଷେପ ଗ୍ରହଣ କରିଛନ୍ତି। ଚାର୍ଧାମ ଯାତ୍ରା କରୁଥିବା ୫୦ ବର୍ଷ କିମ୍ବା ତଦୂର୍ଦ୍ଧ୍ବ ବୟସର ପ୍ରତ୍ୟେକ ଶ୍ରଦ୍ଧାଳୁଙ୍କର ଡାକ୍ତରୀ ପରୀକ୍ଷା କରାଯିବ ବୋଲି ନିଷ୍ପତ୍ତି ନିଆଯାଇଛି। ଯଦି ସ୍ବାସ୍ଥ୍ୟଗତ ସମସ୍ୟା ଭୋଗୁଥାନ୍ତି, ତେବେ ଚାର୍ଧାମ ଯାତ୍ରା ନ କରିବାକୁ ସରକାରଙ୍କ ପକ୍ଷରୁ ଶ୍ରଦ୍ଧାଳୁଙ୍କୁ ପରାମର୍ଶ ଦିଆଯାଇଛି।
Popular Categories
Previous article
Next article