ସମାଜ ଡିଜିଟାଲ ଡେସ୍କ: ଯୁଗାଡ଼ କ୍ଷେତ୍ରରେ ଭାରତୀୟମାନେ ସବୁବେଳେ ଆଗରେ ରହିଆସିଛନ୍ତି। ଅଳ୍ପ କିଛି ଅଦରକାରୀ ଜିନିଷରୁ ନୂଆ ନୂଆ ଜିନିଷ ଉଦ୍ଭାବନ କରିବାରେ ଭାରତୀୟମାନେ ମାହିର। ଏହି କ୍ରମରେ ଜଣେ ଯୁବକ ଏକ ସାଧାରଣ କାରକୁ ବିଳାସପୂର୍ଣ୍ଣ କାରରେ ପରିଣତ କରି ଚର୍ଚ୍ଚାରେ ରହିଛନ୍ତି। ନିଜର ବୁଦ୍ଧି ଖଟାଇ ଯୁବକ ଜଣକ ହୋଣ୍ଡା ସିଭିକ୍ କାର, ଏବଂ ଅନ୍ୟ ସାଧାରଣ କାର୍ର ଅଂଶକୁ ବ୍ୟବହାର କରି ଏକ ଲମ୍ବୋରଗିନି କାରରେ ପରିଣତ କରିଦେଇଛନ୍ତି। ଯେଉଁଥିରେ ଖର୍ଚ୍ଚ ହୋଇଛି ପ୍ରାୟ ୧୨ ଲକ୍ଷ ୫୦ ହଜାର ଟଙ୍କା। କାର ତିଆରି ସମୟର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ଯୁବକ ଜଣକ ହେଉଛନ୍ତି ଜଣେ ୟୁଟ୍ୟୁବର। ତାଙ୍କ ନାମ ଟାନା ଧାୱଲ। ଏକ ପୁରୁଣା ହୋଣ୍ଡା ସିଭିକ କାର୍କୁ ସେ ଫ୍ୟୁଚର ଲମ୍ବୋରଗିନି ଟେର୍ଜୋ ମିଲେନିଓ କନସେପ୍ଟ କାରରେ ପରିଣତ କରିଛନ୍ତି। ଏହି କାର୍ଟି ଅତ୍ୟନ୍ତ ଆକର୍ଷଣୀୟ ହୋଇଛି। ସୋସିଆଲ ମିଡିଆରେ ଅନେକ ଲୋକ ଧାୱଲଙ୍କ କାର୍ଯ୍ୟକୁ ଢେର ପ୍ରଶଂସା କରିଛନ୍ତି।
ଭିଡିଓଟିରେ ଧୱାଲ ଏବଂ ତାଙ୍କ ଟିମ୍ ଲମ୍ବୋରଗିନି କନ୍ସେପ୍ଟ କାର ତିଆରି ପାଇଁ ପ୍ରଥମେ ଏକ ହୋଣ୍ଡା ସିଭିକ୍ କାରର କିଛି ଅଂଶ ଯୋଗାଡ଼ କରିଥିଲେ, ଯେପରି କି କ୍ୟାବିନ, ଇଞ୍ଜିନ। ଏହାପରେ ସେ ଫାଇବର ଗ୍ଲାସରେ ତିଆରି କରିଥିଲେ ଲମ୍ବୋରଗିରି ଟେର୍ଜୋ ମିଲେନିଓ ଭଳି ଅବିକଳ ଦିଶୁଥିବା କାର୍ର ବଡିକୁ ଇଞ୍ଜିନ ଓ କ୍ୟାବିନ୍ ସହିତ ଫିଟ୍ କରିଥିଲେ। ଅନ୍ୟ ଗାଡ଼ିରୁ ବି ସେମାନେ କିଛି ଯନ୍ତ୍ରପାତି ବ୍ୟବହାର କରିଥିଲେ। ଯେପରି କି ହ୍ୟୁଣ୍ଡାଇ ସାଣ୍ଟ୍ରୋ କାର୍ରୁ ଇନ୍ଧନ ଟାଙ୍କି, ମାରୁତି ସୁଜୁକି ଅଲ୍ଟୋରୁ ସସ୍ପେନ୍ସନ ସିଷ୍ଟମ ଆଣି ତାଙ୍କ ନିଜ ମଡେଲରେ ଖଞ୍ଜିଥିଲେ। ଏପରି କି ବେନେଲି ୬୦୦ଆଇ ମୋଟରସାଇକେଲର ଇଗ୍ଜଷ୍ଟ ସିଷ୍ଟିମ ଆଣି ଖଞ୍ଜିଛନ୍ତି।
