କଲ୍ୟାଣସିଂହପୁର: ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ପାର୍ସାଲି ପଞ୍ଚାୟତର ନିୟମଗିରି ପାହାଡ଼ରେ ବସବାସ କରୁଥିବା ଆଦିମ ଜନଜାତି ଡଙ୍ଗରିଆ କନ୍ଧମାନେ ମାମଲା ନ ଉଠାଇବା ପର୍ଯ୍ୟନ୍ତ ଭୋଟବର୍ଜନ କରିବା ପାଇଁ ନିଷ୍ପତ୍ତି ନେଇଛନ୍ତି। ରବିବାର ନିୟମଗିରି ଆବାହକ ଲଦ ଶିକକାଙ୍କ ନିର୍ଦେଶରେ ଲାଖପଦର ଗ୍ରାମରେ ଏକ ବୈଠକ ଅନୁଷ୍ଠିତ ହୋଇଥିଲା। ସରକାର ଆମର ବିକାଶ ନାମରେ ବହୁତ ଲୁଟ୍ ଓ ଶୋଷଣ କରୁଛନ୍ତି।
ଆମକୁ ଅଙ୍ଗନବାଡ଼ି କେନ୍ଦ୍ର, ଗାଁରେ ସିସି ରାସ୍ତା, ବିଦ୍ୟାଳୟ, ବିଶୁଦ୍ଧ ପାନୀୟଜଳ ଓ ସ୍ୱାସ୍ଥ୍ୟସେବା ଆବଶ୍ୟକ ରହିଥିବାବେଳେ ତାହା ନ କରି ଆମକୁ ପ୍ରତାରିତ କରୁଛନ୍ତି। ଏଗୁଡ଼ିକ ଆବଶ୍ୟକ ରହିଛି ବୋଲି ଜିଲାପାଳଙ୍କୁ ଜଣାଇଥିଲେ ମଧ୍ୟ କୌଣସି ବିକାଶ ହୋଇପାରୁ ନାହିଁ। ପାର୍ସାଲିରେ ପ୍ରାୟ ୪୦ବର୍ଷ ହେବ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା ରହି ଆମର କ’ଣ ବିକାଶ କରିଛି। ଓପିଲିପି ମଧ୍ୟ ଆମର କୌଣସି ବିକାଶ କରିନାହିଁ। କେବଳ ନିୟମଗିରି ପାହାଡ଼ରେ ଥିବା ଖଣି ଉପରେ ନଜର କରି ବେଦାନ୍ତ କମ୍ପାନୀକୁ ସାହାଯ୍ୟ କରୁଛନ୍ତି।
ଓପିଲିପିକୁ ଉଠାଇ ଦେଲେ ମଧ୍ୟ ଆମର ଆପତ୍ତି ନାହିଁ। ଆମେ ନିୟମଗିରିର ୧୧୨ ଖଣ୍ଡ ଗ୍ରାମବାସୀ ନିଜ ଭିଟାମାଟି ମା’ ପାଇଁ ଜଳ, ଜମି, ଜଙ୍ଗଲ ବିକାଶ ପାଇଁ ଲଢ଼ି ଆସୁଛୁ। କିନ୍ତୁ ତାହାକୁ ନେଇ ପୁଲିସ ନିରୀହ ଡଙ୍ଗରିଆମାନଙ୍କୁ ମାଓବାଦୀ ଆଖ୍ୟା ଦେଇ ଆନ୍ଦୋଳନକାରୀଙ୍କ ନାମରେ ମାମଲା ରୁଜୁ କରିଛି। ଜେଣ ଜଣଙ୍କ ନଁାରେ ୪ରୁ ୫ଟି ଲେଖାଏଁ ମାମଲା କରିଛନ୍ତି। ଏହି ସବୁ ମାମଲା ଆମ ନାମରୁ ଉଠାଇ ଦେଲେ ଆମେ ଭୋଟ ଦେବୁ। ନ ହେଲେ ଆମେ ଭୋଟ ଦେବୁ ନାହିଁ ବୋଲି ଡଙ୍ଗରିଆଙ୍କ ବୈଠକରେ ନିଷ୍ପତ୍ତି ହୋଇଛି।
ଏପ୍ରିଲ ମାସରେ ଜିଲା ଆରକ୍ଷୀ ଅଧୀକ୍ଷକ ଲାଖପଦର ଓ ପାର୍ସାଲି ଆସି ତୁମର ସବୁ କେସ ଉଠାଇ ଦେବି ଏବଂ ତୁମକୁ ସାହାଯ୍ୟ କରିବା ପାଇଁ ଆସିଛି ବୋଲି କହିଥିଲେ। କିନ୍ତୁ ତାହା ମିଥ୍ୟା ପ୍ରମାଣିତ ହୋଇଥିବା ଲଦ କହିଛନ୍ତି। ନିୟମଗିରି ଡଙ୍ଗରିଆ କନ୍ଧ ସମେତ ସିଜୁମାଳି, ଖଣ୍ଡୁଆମାଳି, ଦେଉଳମାଳି, ହନୁମାନମାଳି, ପାପଡାମାଳି, ଫର୍କୀ ମାଳିକୁ ସରକାର ଲିଜ୍ ଦେଇଛନ୍ତି। ସେ ସବୁ ବାତିଲ କରାଯାଉ, ନଚେତ ଉକ୍ତ ଅଞ୍ଚଳର ଡଙ୍ଗରିଆମାନେ ମଧ୍ୟ ଭୋଟ ବର୍ଜନ କରିବାକୁ ନିଷ୍ପତ୍ତି ନିଆଯାଇଥିବା ଲଦ ଶିକକା କହିଛନ୍ତି।
