ହାଇଦ୍ରାବାଦ: ଏକ ମସଜିଦ ଆଡକୁ ପ୍ରଭୁ ଶ୍ରୀରାମଙ୍କ ଧନୁତୀରର କାଳ୍ପନିକ ଅଙ୍ଗଭଙ୍ଗୀ ଦେଖାଇ ଅଡୁଆରେ ପଡ଼ିଛନ୍ତି ବିଜେପି ଲୋକସଭା ପ୍ରାର୍ଥୀ କୋମ୍ପେଲା ମାଧବୀ ଲତା। ରମନବମୀ ଶୋଭାଯାତ୍ରା ସମୟରେ ମାଧବୀ ଲତା ଏକ ମସଜିଦକୁ ପ୍ରଭୁ ଶ୍ରୀରାମଙ୍କ ଧନୁତୀରର କାଳ୍ପନିକ ଅଙ୍ଗଭଙ୍ଗୀ ଦେଖାଉଥିବାର ଭିଡିଓ ଭାଇରାଲ ହୋଇଥିଲା। ଏ ସମ୍ପର୍କରେ ତାଙ୍କ ବିରୋଧରେ ଥାନାରେ ଅଭିଯୋଗ ହେବା ପରେ ମାମଲା ରୁଜୁ ହୋଇଥିବା ସୂଚନା ମିଳିଛି।
ପ୍ରଭୁ ଶ୍ରୀରାମ ଯେପରି ଧନୁତୀର ନିଜ ହାତରେ ଭିଡୁଥିବାର କାଳ୍ପନିକ ଚିତ୍ରରେ ଦେଖିବାକୁ ମିଳିଥାଏ ମାଧବୀ ଲତା ଠିକ୍ ସେହିପରି କରୁଥିବା ଭିଡିଓଟିରେ ଦେଖିବାକୁ ମିଳିଥିଲା। ଧନୁତୀରର ଦିଗ ମସଜିଦ ଆଡକୁ ରହିଥିଲା। ଏହାପରେ ବେଗୁମବଜାର ଥାନାରେ ଦଫା ୨୯୫ଏ(ଉଦ୍ଦେଶ୍ୟମୂଳକ ଭାବେ ଚିତ୍ର, ଶବ୍ଦ ଏବଂ ଲେଖା ଦ୍ବାରା ଧାର୍ମିକ ଭାବନାକୁ ଆଘାତ ପହଞ୍ଚାଇବା)ରେ ତାଙ୍କ ବିରୋଧରେ ଏତଲା ଦାୟର ହୋଇଥିଲା। ଭିଡିଓ ଭାଇରାଲ ହେବା ପରେ ହାଇଦ୍ରାବାଦ ଏମପି ବିଜେପିକୁ କଡ଼ା ସମାଲୋଚନା କରିବା ସହିତ ଏହି ଦଳ ସହରର ଶାକ୍ତି ଭଙ୍ଗ କରୁଛି ବୋଲି ଅଭିଯୋଗ କରିଛନ୍ତି।
ଅନ୍ୟପଟେ ଏହି ଘଟଣାକୁ ନେଇ ମାଧବୀ ଲତା ନିଜର ସ୍ପଷ୍ଟୀକରଣ ରଖିଛନ୍ତି। ସେ କହିଛନ୍ତି ଯେ, ଉକ୍ତ ଭିଡିଓଟିକୁ ଏଡିଟ୍ କରାଯାଇଛି। ମୋ ବିଷୟରେ ଅପପ୍ରଚାର କରିବା ଲାଗି ଏପରି ଭିଡିଓ ପ୍ରସ୍ତୁତ କରାଯାଇ ସାମାଜିକ ଗଣମାଧ୍ୟମରେ ପ୍ରସାର କରାଯାଉଛି। ଏହି ଭିଡିଓଟି ଅସମ୍ପୂର୍ଣ୍ଣ ରହିଛି। ଯଦି ଏହି ଭିଡିଓ କାହାର ଧାର୍ମିକ ଭାବନାକୁ ଆଘାତ ପହଞ୍ଚାଇଥାଏ, ତେବେ ସେଥିଲାଗି କ୍ଷମା ପ୍ରାର୍ଥନା କରୁଛି ବୋଲି ମାଧବୀ ଲତା ଏକ୍ସ (ପୂର୍ବରୁ ଟ୍ବିଟର)ରେ ଏକ ପୋଷ୍ଟ ଜରିଆରେ କହିଛନ୍ତି।
Comments are closed.