ଚୌଦ୍ୱାର: ୫୫ନମ୍ବର ଜାତୀୟ ରାଜପଥର ଚୌଦ୍ୱାର ନିକଟ ଧୁମାବତୀ ଛକରେ ସଡକ ଦୁର୍ଘଟଣାରେ ସୋମନାଥ ସ୍ୱାଇଁ ନାମକ ଜଣେ ଯୁବକଙ୍କ ମୃତ୍ୟୁ ଘଟିଛି । ଚୌଦ୍ୱାର ପୌରପାଳିକା ୧୩ନଂ ୱାର୍ଡ ପାଇକରାପୁର ଗ୍ରାମର ସୋମନାଥ ସବୁଦିନ ପରି ମଙ୍ଗଳବାର ସକାଳେ ନିଜ ମଟର ସାଇକେଲରେ ସ୍ଥାନୀୟ କାରଖାନାକୁ କାମ କରିବାକୁ ଆସୁଥିବା ବେଳେ ଧୂମାବତୀ ଛକ ନିକଟରେ ପଛରୁ ଏକ ଟ୍ରକ ତାଙ୍କୁ ଧକ୍କା ଦେଇଥିଲା । ସେ ବାଇକ ସହିତ ଟ୍ରକ ଚକା ତଳେ ପଡିଯିବା ଫଳରେ ଟ୍ରକଟି ତାଙ୍କ ଉପରେ ଚଢିଯାଇଥିଲା। ପୁଲିସ ଘଟଣାସ୍ଥଳରେ ପହଞ୍ଚି ଯୁବକଙ୍କୁ ଗୁରୁତର ଅବସ୍ଥାରେ କଟକ ବଡ ଡାକ୍ତରଖାନା ପଠାଇଥିଲେହେଁ ରାସ୍ତାରେ ତାଙ୍କର ମୃତ୍ୟୁ ଘଟିଥିବା ସୂଚନା ଦିଆଯାଇଛି।
ଦୁର୍ଘଟଣା ପରେ ଘଟଣାସ୍ଥଳରେ ସ୍ଥାନୀୟ ଲୋକେ ଓ ପାଇକରାପୁର ଗ୍ରାମବାସୀ ରୁଣ୍ଡ ହୋଇ ଯିବା ଫଳରେ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା। ଧୁମାବତୀ ଛକରେ ଟ୍ରାଫିକ ନିୟନ୍ତ୍ରଣ ବ୍ୟବସ୍ଥା ସହିତ ମୃତକଙ୍କ ପରିବାରକୁ କ୍ଷତିପୁୂରଣ ପ୍ରଦାନ କରିବା ଦାବିରେ ଲୋକମାନେ ଜାତୀୟ ରାଜପଥକୁ ଅବରୋଧ କରିଥିଲେ । ଫଳରେ କିଛି ସମୟ ପାଇଁ ଯାନ ବାହନ ଚଳାଚଳ ବ୍ୟାହତ ହୋଇଥିଲା ।ପୁଲିସ ଉତ୍ୟକ୍ତ ଲୋକମାନଙ୍କୁ ବୁଝାସୁଝା କରି ଯାତାୟତ ସ୍ୱଭାବିକ କରାଇଥିଲେ। ଜାତୀୟ ରାଜପଥ ସଂପ୍ରସାରଣ କାର୍ଯ୍ୟ ଅତି ମନ୍ଥର ଗତିରେ ଚାଲୁଥିବା ଓ ସର୍ଭିସ୍ ରୋଡ଼ରେ ଭାରିଯାନ ସହିତ ସମସ୍ତ ହାଲୁକା ଯାନ ଚଳାଚଳ କରିବା ହେତୁ ବାରମ୍ବାର ଦୁର୍ଘଟଣାମାନ ଘଟି ବହୁ ଧନ ଜୀବନ ହାନୀ ହେଉଥିବାରୁ ଜାତୀୟ ରାଜପଥ ପ୍ରଧିକରଣ ଏଦିଗରେ ତୁରନ୍ତ ପଦକ୍ଷେପ ନେବାକୁ ଦାବି ହେଉଛି ।
Comments are closed.