ନୂଆଦିଲ୍ଲୀ : ବଳାତ୍କାର ପୀଡ଼ିତାଙ୍କ ନାମ ସହ ଅନ୍ୟ ସୂଚନା ଛପା ଓ ବୈଦ୍ୟୁତିକ ଗଣମାଧ୍ୟମରେ ସାମାନ୍ୟତମ ବି ପ୍ରକାଶିତ ହେବା ଅନୁଚିତ୍ ବୋଲି ଦେଶର ସର୍ବୋଚ୍ଚ ନ୍ୟାୟଳୟ ନିର୍ଦେଶ ଦେଇଛନ୍ତି । ଏବେ ବି ଦେଶର ଅନେକାଂଶରେ ଏମାନଙ୍କୁ ଅସ୍ପୃଶ୍ୟ ଭାବେ ବ୍ୟବହାର କରାଯିବା ଅତ୍ୟନ୍ତ ଦୂର୍ଭାଗ୍ୟଜନକ ବୋଲି ସୁପ୍ରିମକୋର୍ଟ ନିଜ ରାୟରେ ଦର୍ଶାଇଛନ୍ତି ।
ଜଷ୍ଟିସ ମଦନ ବି ଲୋକୁରଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହି ରାୟ ଦେଇଛନ୍ତି । ପୀଡିତାଙ୍କର ସାମାନ୍ୟତମ ସୂଚନା ଦିଆଯିବ ନାହିଁ ବୋଲି ନିଜ ରାୟରେ ଦର୍ଶାଇଛନ୍ତି । ବଳାତ୍କାର, ଅସଦାଚରଣ ସହ ନାବାଳକ ଓ ନାବାଳିକାଙ୍କ ପ୍ରତି ହେଉଥିବା ଯୌନ ଅତ୍ୟାଚାରରେ ନାମ ପରିଚୟ ସହ ସାମାନ୍ୟତମ ସୂଚନା ଖବରରେ ପ୍ରକାଶିତ ନ କରିବା ପାଇଁ ସୁପ୍ରିମ କୋର୍ଟ ନିର୍ଦେଶ ଦେଇଛନ୍ତି । ଏହି ମାମଲାର ଶୁଣାଣୀ ବେଳେ ବରିଷ୍ଠ ଆଇନଜୀବୀ ଇନ୍ଦିରା ଜୟସିଂହଙ୍କୁ କୋର୍ଟମିତ୍ର ବା ଆମିକ୍ୟୁସ କ୍ୟୁରି ଭାବେ ନିଯୁକ୍ତି ଦିଆଯାଇଥିଲା ।
କେତକ ପ୍ରସଙ୍ଗରେ ଏପରି ଘଟଣାର ଖବର ପ୍ରକାଶନ ସଂସ୍ଥାମାନଙ୍କର ସମାନ୍ତରଳ ଟ୍ରାଏଲ୍ ହେଉଥିବା କଥା ଜୟସିଂହ ଦର୍ଶାଇଥିଲେ । ଏଥିପାଇଁ ମହିଳାଙ୍କ ବିରୋଧରେ ହେଉଥିବା ଅପରାଧରେ ଖବର ପ୍ରସାରଣ ପାଇଁ ମାର୍ଗଦର୍ଶିକା ଜାରି କରିବା ପାଇଁ ସେ ପରାମର୍ଶ ଦେଇଥିଲେ । ଜୟିସିଂହ, ପୁଲିସ ମାମଲା ରୁଜୁ ହେବା ପୂର୍ବରୁ ଖବରଦାତାମାନଙ୍କୁ ସୂଚନା ଲୁଚା ଛପାରେ ଦେଉଥିବା କଥା କହିଥିଲେ । ଏଥିରେ ସେ କାଠୁଆର ଉଦାହରଣ ଦେଇଥିଲେ । ଏଥିପାଇଁ ସେ ଭାରତୀୟ ପିଙ୍ଗଳ ଧାରା ଓ ପୋକସ୍ ବା ଶିଶୁ ଯୌନ ଅପରାଧ ସୁରକ୍ଷା ଆଇନରେ ଥିବା ବିଭିନ୍ନ ଧାରାରେ ଏଥିପାଇଁ ଥିବା ବିଧାନର ବିଷୟରେ ଉପସ୍ଥାପନ କରିଥିଲେ । ଖବର ପ୍ରକାଶନ ବେଳେ କିପରି ଭାବେ ପୀଡିତାମାନଙ୍କର ସାମାନ୍ୟତମ ପରିଚୟ ଦିଆ ନଯିବ ସେ ବିଷୟରେ ଯୁକ୍ତି ଦର୍ଶାଇଥିଲେ ।
