ହଳଦ୍ବାନୀ ଦଙ୍ଗାର ଭୟଙ୍କର ଦୃଶ୍ୟ: ପୁଲିସ କର୍ମୀ କହିଲେ, ‘ଚାରିଆଡୁ ପଥର ସହ ମାଡ ହେଉଥିଲା ଭଙ୍ଗା କାଚ’

ହଳଦ୍ବାନୀ : ଉତ୍ତରାଖଣ୍ଡର ହଳଦ୍ବାନୀରେ ଦଙ୍ଗା ଭୟଙ୍କର ରୂପ ନେଇଛି ।  ନୈନିତାଲ ଜିଲା ହଳଦ୍ବାନୀର ବନଭୁଲପୁରା ଅଞ୍ଚଳରେ ନଗର ନିଗମର ବେଆଇନ ନିର୍ମାଣ ହଟାଅ ଅଭିଯାନ ସମୟରେ ଦଙ୍ଗା ଆରମ୍ଭ ହୋଇଥିଲା । ଏହି ଦଙ୍ଗାରେ ଏବେ ସାରା ସହର ଜଳୁଛି । ଏଥିରେ ଏପର୍ଯ୍ୟନ୍ତ ୬ ଜଣଙ୍କ ଜୀବନ ଯିବା ସହ ୨୦୦ରୁ ଅଧିକ ଆହତ ହୋଇଛନ୍ତି । ପରିସ୍ଥିତିକୁ କାବୁ କରିବା ପାଇଁ ଜିଲାରେ କର୍ଫ୍ୟୁ ଜାରି ହୋଇଛି । ତେବେ ଏହି ଦୃଶ୍ୟ ସାମ୍ନାକୁ ଆସିବା ପରେ ଲୋମ ଟାଙ୍କୁରି ଯାଉଛି । ଘଟଣାକୁ ବଖାଣିଛନ୍ତି ଜଣେ ପୁଲିସ କର୍ମୀ ।

ଆହତ ହୋଇଥିବା ଜଣେ ମହିଳା ପୁଲିସ କର୍ମୀ କୁହନ୍ତି କି ଉପଦ୍ରବ ଆରମ୍ଭ ହେବା ପରେ ସେ ଜୀବନ ବଞ୍ଚାଇବା ପାଇଁ ଏକ ଘରେ ପଶିଗଲେ । ତାଙ୍କ ସହିତ ଆଉ ୧୫ -୨୦ ଜଣ ମଧ୍ୟ ନିଜକୁ ରକ୍ଷା କରିବା ପାଇଁ ସେ ଘରେ ପଶିଗଲେ । ସେହି ସମୟରେ ବାହାରେ ଦଙ୍ଗା ସୃଷ୍ଟିକାରୀ ସେହି ଘରେ ନିଆଁ ଲଗାଇଦେବା ସହ ବାହାରୁ ଥାଇ ପଥର ମାଡ କଲେ ।

ହସ୍ପିଟାଲରେ ଚିକିତ୍ସିତ ହେଉଥିବା ଅନ୍ୟ ଜଣେ ପୁଲିସକର୍ମୀ କୁହନ୍ତି କି ପରିସ୍ଥିତି ଅତି ଖରାପ ଥିଲା । ଚାରିଆଡେ ପଥର ମାଡ ସହ କାଚ ମଧ୍ୟ ଫୋପାଡୁଥିଲେ ଉପଦ୍ରବକାରୀ । ଯିଏ ତାଙ୍କୁ ରକ୍ଷା କରିଥିଲା ତା ଘର ଭାଙ୍ଗି ଦେଇଥିଲେ ବିକ୍ଷୋଭକାରୀ ।  ପ୍ରାୟ ୨୦୦ରୁ ଅଧିକ ପୁଲିସକର୍ମୀ ଆହତ ହୋଇଥିବା ସେ କହିଛନ୍ତି । ସମସ୍ତଙ୍କ ଚିକିତ୍ସା ଚାଲିଛି । ଆହତଙ୍କ ମଧ୍ୟରେ ନଗର ନିଗମ କର୍ମଚାରୀଙ୍କ ସମେତ ଅନେକ ସାମ୍ବାଦିକ ମଧ୍ୟ ଆହତ ହୋଇଛନ୍ତି । ସମସ୍ତଙ୍କ ଗାଡିରେ ନିଆଁ ଲଗାଇ ଦେଇଥିଲେ ବିକ୍ଷୋଭକାରୀ । ତେବେ  ପରିସ୍ଥିତିକୁ ନଜରରେ ରଖି ଜିଲାରେ କର୍ଫ୍ୟୁ ଲଗାଇ ଦିଆଯାଇଛି । ଆସନ୍ତାକାଲି ପର୍ଯ୍ୟନ୍ତ ସମସ୍ତ ସ୍କୁଲ ବନ୍ଦ କରିବା ପାଇଁ ନିର୍ଦ୍ଦେଶ ଦିଆଯାଇଛି ।