ମୁମ୍ବଇ: ବଲିଉଡ଼ ଅଭିନେତା ରଣବୀର କପୁର ନିକଟରେ ରିଲିଜ୍ ହୋଇଥିବା ତାଙ୍କ ଫିଲ୍ମ ‘ଆନିମଲ୍’ର ସଫଳତା ପାଇଁ ଉତ୍ସବ ପାଳନ କରୁଛନ୍ତି। ଏହି କ୍ରମରେ ସେ ନିକଟରେ ପରିବାର ସହ ଖ୍ରୀଷ୍ଟମାସ ପାଳନ କରୁଥିବା ଦେଖିବାକୁ ମିଳିଛି। ଏହି ଅବସରରେ ସେ ତାଙ୍କ ଝିଅ ରାହାକୁ ମଧ୍ୟ ପ୍ରଥମ ଥର ପାଇଁ ଗଣମାଧ୍ୟମ ସାମ୍ନାକୁ ଆଣିଛନ୍ତି। ତେବେ ରଣବୀରଙ୍କ ଖ୍ରୀଷ୍ଟମାସ ପାଳନ ସମୟର ଏକ ଭିଡିଓ ସାମାଜିକ ଗଣମାଧ୍ୟମରେ ଖୁବ୍ ଭାଇରାଲ୍ ହେଉଛି, ଯାହାକୁ ନେଇ ଅଡ଼ୁଆରେ ଫସିଛନ୍ତି ଅଭିନେତା। ଏହି ଭିଡିଓକୁ ନେଇ ରଣବୀରଙ୍କ ବିରୋଧରେ ଏବେ ଥାନାରେ ଏତଲା ଦାୟର ହୋଇଛି।
ଭାଇରାଲ୍ ଭିଡିଓରେ ରଣବୀର କେକ୍ ଉପରେ ମଦ ଢାଳି ସେଥିରେ ନିଆଁ ଲଗାଉଛନ୍ତି ଏବଂ ସେହି ସମୟରେ ବଡ଼ ପାଟିରେ ଜୟ ମାତା ଦୀ କହୁଛନ୍ତି। ଅଭିନେତାଙ୍କ ଏଭଳି କାର୍ଯ୍ୟକଳାପ ଲୋକଙ୍କୁ ଆଦୌ ପସନ୍ଦ ଆସିନାହିଁ। ଏହାକୁ ନେଇ ରଣବୀରଙ୍କ ବିରୋଧରେ ଧାର୍ମିକ ଭାବନାକୁ କୁଠାରଘାତ କରିଥିବା ଅଭିଯୋଗ ହୋଇଛି। ଏଥିସହ ସାମାଜିକ ଗଣମାଧ୍ୟମରେ ତାଙ୍କୁ ଖୁବ୍ ସମାଲୋଚନା ମଧ୍ୟ କରାଯାଉଛି।
Saying "Jai mata di" while cutting cake, the way Ranbir Kapoor is giving us pure sanatan dharma vibes 👑❤️pic.twitter.com/W1YB9cP1vE
— Sia⋆ (@siappaa_) December 25, 2023
ବଲିଉଡ ଅଭିନେତାଙ୍କ ଭାଇରାଲ ଭିଡିଓକୁ ନେଇ ଚର୍ଚ୍ଚା ଜୋର ଧରିଛି। ଏ ସମ୍ପର୍କରେ ବୁଧବାର ମୁମ୍ବଇର ଏକ ଥାନାରେ ତାଙ୍କ ବିରୋଧରେ ଅଭିଯୋଗ କରାଯାଇଛି। ତେବେ ଏ ସଂକ୍ରାନ୍ତରେ ବର୍ତ୍ତମାନ ସୁଦ୍ଧା କୌଣସି ଏତଲା ଦାୟର ହୋଇ ନଥିବା ଜଣାପଡ଼ିଛି।
ନିଜ ଓକିଲ ଆଶିଷ ରାୟ ଏବଂ ପଙ୍କଜ ମିଶ୍ରଙ୍କ ମାଧ୍ୟମରେ ଘାଟକୋପର ଥାନାରେ ଅଭିଯୋଗ ଦାଖଲ କରିଥିବା ସଞ୍ଜୟ ତିୱାରୀ ଦାବି କରିଛନ୍ତି ଯେ, ଭିଡିଓରେ ଅଭିନେତା ଜୟ ମାତା ଦୀ କହି କେକ୍ ଉପରେ ମଦ ଢାଳି ସେଥିରେ ନିଆଁ ଲଗାଉଥିବା ଦେଖିବାକୁ ମିଳିଛି। ଅଭିଯୋଗରେ କୁହାଯାଇଛି ଯେ, ହିନ୍ଦୁ ଧର୍ମରେ ଅନ୍ୟ ଦେବତାଙ୍କ ଆବାହନ କରିବା ପୂର୍ବରୁ ଅଗ୍ନି ଦେବତାଙ୍କୁ ଆବାହନ କରାଯାଇଥାଏ, କିନ୍ତୁ କପୁର ଓ ତାଙ୍କ ପରିବାର ସଦସ୍ୟ ଅନ୍ୟ ଧର୍ମର ପର୍ବ ପାଳନ ସମୟରେ ଜାଣି ଶୁଣି ନିଶା ଦ୍ରବ୍ୟର ବ୍ୟବହାର କରିଛନ୍ତି ଓ ଜୟ ମାତା ଦୀ ନାରା ଲଗାଇଛନ୍ତି। ଏହାଦ୍ବାରା ଅଭିଯୋଗକାରୀଙ୍କ ଧାର୍ମିକ ଭାବନାକୁ ଆଘାତ ପହଞ୍ଚଥିବା ଅଭିଯୋଗ ହୋଇଛି।
