ସିଡ୍ନୀ : ଆଜକୁ ତିନି ବର୍ଷ ପୂର୍ବେ ଅଷ୍ଟ୍ରେଲିଆରେ ଦାୟର ହୋଇଥିବା ଏକ ମାନହାନି ମକଦ୍ଦମାରେ ୱେଷ୍ଟଇଣ୍ଡିଜର ଓପନିଂ ବ୍ୟାଟସମ୍ୟାନ କ୍ରିସ ଗେଲ୍ ବିଜୟୀ ହୋଇଛନ୍ତି। ସୋମବାର ଅଷ୍ଟ୍ରେଲିଆର ଏକ ଅଦାଲତ ତାଙ୍କ ରାୟରେ ଗେଲ୍ଙ୍କୁ ନିର୍ଦୋଷ ପ୍ରମାଣିତ କରିବା ସହ କ୍ଷତିପୂରଣ ବାବଦରେ ୩,୦୦,୦୦୦ ଅଷ୍ଟ୍ରେଲୀୟ ଡଲାର ପ୍ରଦାନ କରିବାକୁ ଫେୟାରଫ୍ୟାକ୍ସ ମିଡିଆକୁ ନିର୍ଦେଶ ଦେଇଛନ୍ତି। ୨୦୧୬ ଜାନୁଆରୀରେ ସ୍ଥାନୀୟ ଗଣମାଧ୍ୟମ ଫେୟାରଫ୍ୟାକ୍ସ ମିଡିଆ ପକ୍ଷରୁ ଗେଲ୍ଙ୍କ ବିରୋଧରେ ଏକ ଆପତ୍ତିଜନକ ସମ୍ବାଦ ପ୍ରକାଶିତ ହୋଇଥିଲା। ୨୦୧୫ରେ ଅଷ୍ଟ୍ରେଲିଆରେ ଆଇସିସି ବିଶ୍ୱକପ କ୍ରିକେଟ ଟୁର୍ଣ୍ଣାମେଣ୍ଟ ଖେଳୁଥିବାବେଳେ ଗେଲ୍ କୁଆଡେ ଜଣେ ମହିଳା ମାଲିସ କର୍ମଚାରୀଙ୍କ ସମ୍ମୁଖରେ ଉଲଗ୍ନ ହୋଇଥିଲେ ବୋଲି ଉକ୍ତ ରିପୋର୍ଟରେ ଉଲ୍ଲେଖ କରାଯାଇଥିଲା। ଏହା ଗେଲ୍ଙ୍କ ସୁନାମ ପ୍ରତି ଆଞ୍ଚ୍ ଆଣିଥିଲା। ଫଳରେ ସେ ଉକ୍ତ କମ୍ପାନୀ ବିରୋଧରେ କ୍ଷତିପୂରଣ ମାମଲା ଦାଏର କରିଥିଲେ। ନ୍ୟୁ ସାଉଥ୍ ୱେଲ୍ସ ସୁପ୍ରିମକୋର୍ଟର ବିଚାରପତି ଲୁସି ମ୍ୟାକ୍କଲମ ଏହାର ଶୁଣାଣି କରି ଫେୟାରଫ୍ୟାକ୍ସ ମିଡିଆ ବିପକ୍ଷରେ ରାୟ ଦେଇଛନ୍ତି। ନିଜ ସମ୍ବାଦପତ୍ରର ଲୋକପ୍ରିୟତା ବୃଦ୍ଧି କରିବା ଲକ୍ଷ୍ୟରେ ଗେଲ୍ଙ୍କ ଭଳି ଜଣେ ବିଶ୍ୱସ୍ତରୀୟ କ୍ରିକେଟରଙ୍କ ବିରୋଧରେ ଆପତ୍ତିଜନକ ଲେଖା ପ୍ରକାଶ କରିଛନ୍ତି ବୋଲି ବିଚାରପତି ତାଙ୍କ ରାୟରେ କହିଛନ୍ତି।
