କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସେରିଗୁମ୍ମା ପଞ୍ଚାୟତର ଦେଉଳବାଡି ଗାଁର ନିଖୋଜ ଯୁବକ ଡ୍ରିବି ମିଣିଆକା(୪୦)ଙ୍କ ମୃତଦେହ ଉଦ୍ଧାର କରିଛି ପୁଲିସ।
ସୂଚନା ଅନୁଯାୟୀ, ଚଳିତ ମାସ ୮ତାରିଖରେ ଡ୍ରିବି ଦେଉଳବାଡି ଗାଁରୁ ସେରିଗୁମ୍ମାକୁ ସାର ଆଣିବାକୁ ଯାଇଥିଲେ । ସେଠାରେ ସାର ନ ମିଳିବାରୁ ଡ୍ରିବି ଏକ କମାଣ୍ଡର ଚାଳକଙ୍କୁ ୪୦୦ଟଙ୍କା ଦେଇ ସିକରପାଇଠାରୁ ସାର ଆଣିଦେବା ପାଇଁ କହିଥିଲେ । ବିଳମ୍ବିତ ରାତି ପର୍ଯ୍ୟନ୍ତ ଡ୍ରିବି ଘରକୁ ନ ଫେରିବାରୁ ପରିବାର ଲୋକେ ସାହି ପଡ଼ିଶା ଓ ସମ୍ପର୍କୀୟମାନଙ୍କୁ କହି ସବୁ ଆଡେ ଖୋଜାଖୋଜି କରିଥିଲେ । ତାପର ଦିନ ୯ତାରିଖ ସନ୍ଧ୍ୟାରେ ଡ୍ରିବିଙ୍କ ମୃତଦେହ ଗାଁ ନିକଟସ୍ଥ ତେନ୍ତୁଳି ଗଛରେ ଝୁଲି ରହିଥିବା କିଛି ଲୋକ ଦେଖି ପରିବାରକୁ ଜଣାଇଥିଲେ । ଏହାପରେ ସ୍ଥାନୀୟ ପୁଲିସକୁ ସୂଚନା ଦେଇଥିଲେ । ଖବର ପାଇ ସ୍ଥାନୀୟ ପୁଲିସ ଅଧିକାରୀ ସୁମନ୍ତି ମହାନ୍ତି ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଥିଲେ । ଗ୍ରାମବାସୀ କହିବା ଅନୁଯାୟୀ, ମୃତକଙ୍କ ପାଟିରୁ ଦାନ୍ତ ବାହାର କରି ପାଟିରେ ପଥର ପୁରାଇ ମାଟି ଲେସି ହୋଇଥିବା ବେଳେ ଶରୀର କ୍ଷତାକ୍ତ ହୋଇଛି । ତେଣୁ ଏହା ହତ୍ୟା ନା ଆତ୍ମହତ୍ୟା ଗ୍ରାମବାସୀ ସନ୍ଦେହ ଘେରରେ ରହିଛନ୍ତି । ମୃତ ବ୍ୟକ୍ତିଙ୍କର ଦୁଇ ପୁଅ ଓ ଦୁଇ ଝିଅ ଥିବା ଜଣାପଡିଛି । ଏ ସମ୍ପର୍କରେ ଥାନା ଅଧିକାରୀ ସୁମନ୍ତି ମହାନ୍ତିଙ୍କୁ ଯୋଗାଯୋଗ ହୋଇପାରିନଥିବା ବେଳେ ଘଟଣା ସ୍ଥଳକୁ ଆସିଥିବା ତଦନ୍ତକାରୀ ଦଳଙ୍କୁ ପଚାରିବାରୁ ଆମେ ସୂଚନା ଦେଲେ ଠିକ ହେବ ନାହିଁ ଥାନା ଅଧିକାରୀଙ୍କୁ ପଚାର ବୋଲି କହିଛନ୍ତି ।
