୧୯୮୪ ମସିହା ଅକ୍ଟୋବର ୩୧ ତାରିଖ ଆମ ଦେଶ ପାଇଁ ଏକ ଦୁଃଖ ଦାୟକ ଓ ଅଶୁଭ ଦିନ ଥିଲା। କାରଣ ସେହି ଦିନ ଦେଶର ସବୁଠାରୁ ସୁଦୃଢ ଇଚ୍ଛାଶକ୍ତି ସମ୍ପନ୍ନ ଓ ଦୃଢ ସଙ୍କଳ୍ପ ବଦ୍ଧ ଲୌହ ମହିଳା ଇନ୍ଦିରା ଗାନ୍ଧୀଙ୍କୁ ନିର୍ମମ ଭାବେ ହତ୍ୟା କରାଯାଇଥିଲା। ଯାହାଫଳରେ ସାରା ଦେଶରେ ଶୋକର ଛାୟା ଖେଳି ଯାଇଥିଲା।
ହତ୍ୟାର କାରଣ :
କୁହାଯାଏ ଯେ ଇନ୍ଦିରା ଗାନ୍ଧୀଙ୍କ ମୃତ୍ୟୁର ଏକମାତ୍ର କାରଣ ଥିଲା ଖଲିସ୍ତାନ ଓ ଅପରେସନ ବ୍ଲ୍ୟୁ ଷ୍ଟାର। ନା ଅପରେସନ ବ୍ଲ୍ୟୁ ଷ୍ଟାର ହୋଇଥାଆନ୍ତା, ନା ଇନ୍ଦିରା ଗାନ୍ଧୀଙ୍କୁ ହତ୍ୟା କରାଯାଇ ଥାଆନ୍ତା। ହେଲେ ନିଜ ନିଷ୍ପତ୍ତିରୁ କେବେ ଓହରୁ ନଥିବା ଇନ୍ଦିରା ଗାନ୍ଧୀ ନିଜ ଜୀବନ ପ୍ରତି ଥିବା ବିପଦକୁ ଖାତିର ନକରି ପଞ୍ଜାବରେ ଅପରେସନ ବ୍ଲ୍ୟୁ ଷ୍ଟାର ଅଭିଯାନ ପାଇଁ ଅନୁମତି ଦେଇଥିଲେ। ଏହି ଅପରେସନର ଉଦ୍ଦେଶ୍ୟ ଥିଲା ଅମୃତସର ସ୍ଥିତ ହରିମନ୍ଦିର ସାହିବ ପରିସରକୁ ଖଲିସ୍ତାନ ସମର୍ଥକମାନଙ୍କ ଠାରୁ ମୁକ୍ତ କରାଇବା। ତା’ପରେ ବାରମ୍ବାର କହିବା ପରେ ମଧ୍ୟ ଇନ୍ଦିରା ନିଜ ଅଙ୍ଗରକ୍ଷକ ମାନଙ୍କ ମଧ୍ୟରୁ ଶିଖ୍ ମାନଙ୍କୁ ବାହାର କରିନଥିଲେ।
ଶେଷରେ ସେହି ଶିଖ୍ ଅଙ୍ଗରକ୍ଷକଙ୍କ ଦ୍ୱାରା ହିଁ ତାଙ୍କର ହତ୍ୟା ହୋଇଥିଲା। ଅପରେସନ ବ୍ଲ୍ୟୁ ଷ୍ଟାରର ମୂଲ୍ୟ ଶେଷରେ ଇନ୍ଦିରାଙ୍କୁ ଜୀବନ ଦେଇ ସୁଝିବାକୁ ପଡ଼ିଲା।
