ମଥୁରା: ଉତ୍ତରପ୍ରଦେଶର ମଥୁରା ରେଳ ଷ୍ଟେସନରେ ଘଟିଛି ଚାଞ୍ଚଲ୍ୟକର ଘଟଣା। ଦକ୍ଷିଣ ଏକ୍ସପ୍ରେସ୍ ଟ୍ରେନରେ ବୋମା ଥିବା ସୂଚନା ଖେଳାଇ ଦେଇଥିଲା ଆତଙ୍କ। ଫଳରେ ଆରପିଏଫ, ଜିଆରପି ସହ ସ୍ଥାନୀୟ ପୁଲିସ ମିଳିତ ଭାବେ ଷ୍ଟେସନରେ ପରିସରରେ ଚଳାଇଥିଲେ ଜୋରଦାର ଯାଞ୍ଚ ଅଭିଯାନ। ଏହି ସମୟରେ ଯାତ୍ରୀମାନଙ୍କ ଜିନିଷପତ୍ରକୁ ମଧ୍ୟ ଯାଞ୍ଚ କରାଯାଇଥିଲା। ଏହି କାରଣରୁ ଯାତ୍ରୀମାନଙ୍କ ମଧ୍ୟରେ ଖେଳି ଯାଇଥିଲା ଆତଙ୍କ।
ବୁଧବାର ବିଳମ୍ବିତ ରାତିରେ ମଥୁରା ଷ୍ଟେସନରେ ଅଧିକାରୀମାନଙ୍କୁ ସୂଚନା ମିଳିଲା ଯେ, ଦକ୍ଷିଣ ଏକ୍ସପ୍ରେସ୍ ଟ୍ରେନ୍ରେ ବୋମା ଅଛି। ସଙ୍ଗେ ସଙ୍ଗେ ଏହି ସୂଚନା ସୁରକ୍ଷା ବାହିନୀଙ୍କୁ ଦିଆଯାଇଥିଲା। ଦେଖୁ ଦେଖୁ ଷ୍ଟେସନ ପରିସର ପୁଲିସ ଛାଉଣି ହୋଇଯାଇଥିଲା। ପ୍ଲାଟଫର୍ମ ନମ୍ବର ୧ରେ ଯାଞ୍ଚ କରାଯାଇଥିଲା। ଷ୍ଟେସନରେ ସ୍ଥାନୀୟ ପୁଲିସ ସମେତ ଆରପିଏଫ, ଜିଆରପି, ଡଗ୍ ସ୍କ୍ବାଡ୍, ବୋମା ନିଷ୍କ୍ରିୟକାରୀ ଦଳ ଟ୍ରେନ୍ ଓ ପ୍ଲାଟଫର୍ମରେ ଦୀର୍ଘ ସମୟ ଧରି ଯାଞ୍ଚ ଅଭିଯାନ ଚଳାଇଥିଲେ। ତେବେ ଟ୍ରେନରେ କିଛି ନ ମିଳିବାରୁ ରାତି ୨ଟା ୪୪ ସମୟରେ ଟ୍ରେନ୍ ଛାଡ଼ିଥିଲା। ଏହି ଟ୍ରେନ୍ ଦିଲ୍ଲୀରୁ ହାଇଦରାବାଦ ଯାଉଥିଲା।
