ଆଠଗଡ : ଶୀତଳଷଷ୍ଠୀ ଯାତ୍ରାକୁ କେନ୍ଦ୍ର କରି ବୋମା ମାଡ ଭଳି ଅଭାବନୀୟ ଘଟଣା ମେଘା ଗ୍ରମରେ ଘଟିଥିବା ଜଣାପଡିଛି । ଆଠଗଡ ଥାନା ଅନ୍ତର୍ଗତ ମେଘା ଗ୍ରାମରେ ପ୍ରଭୁ ଶିବ ଏବଂ ମା’ ପାର୍ବତୀଙ୍କ ବିବାହ ଉତ୍ସବ ଶୋଭାଯାତ୍ରା ଚାଲିଥିବାବେଳେ ଗ୍ରାମର ଦୁଇ ଗୋଷ୍ଠୀଙ୍କ ମଧ୍ୟରେ ପାଦଦଳା ଘଟଣାରୁ ଉତ୍ତେଜନା ପ୍ରକାଶ ପାଇବା ସହ ବାଡିଆପିଟାରେ ୪ରୁ ଅଧିକ ଲୋକ ଆହତ ହୋଇଥିଲେ । ତେବେ ଏହି ଗୋଷ୍ଠୀ ସଂଘର୍ଷ ସମୟରେ ଦୁଇ ଗୋଷ୍ଠୀ ଲୋକଙ୍କ ହାତରେ ବିଭିନ୍ନ ପ୍ରକାରର ମାରଣାସ୍ତ୍ର ରହିଥିବା ପ୍ରତ୍ୟକ୍ଷଦର୍ଶୀଙ୍କ ସୂଚନାରୁ ପ୍ରକାଶ। ଏଭଳି ମୁହାଁମୁହିଁ ଅବସ୍ଥାରେ ଉଭୟ ଗୋଷ୍ଠୀ ରହିଥିବାବେଳେ ଗୁରୁବାର ମେଘା ତଳସାହି କୋଠଘର ସମ୍ମୁଖରେ ବୋମା ମାଡ଼ ହୋଇଥିବା ଗ୍ରାମବାସୀ କହୁଥିବାବେଳେ ପୁଲିସ କିନ୍ତୁ ତାହା ବାଣ ବୋଲି କହୁଛି । ଖବର ପାଇବା ପରେ ଆଠଗଡ଼ ପୁଲିସ ଘଟଣା ସ୍ଥଳରେ ପହଞ୍ଚି ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛି । ତେବେ ଏହି ବୋମାମାଡ଼ରେ କେହି ମୃତାହତ ହୋଇନଥିଲେ ମଧ୍ୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି । ଘଟଣା ସ୍ଥଳରେ ଆଠଗଡ଼ ଥାନା ପକ୍ଷରୁ ବ୍ୟାପକ ପୁଲିସ ସୁରକ୍ଷା ବ୍ୟବସ୍ଥା କରାଯାଇଛି । ଆଠଗଡ ଥାନାରେ ଏପର୍ଯ୍ୟନ୍ତ କୌଣସି ଅଭିଯୋଗ ହୋଇ ନଥିବାବେଳେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଥିବା ଜଣାପଡିଛି ।
Comments are closed.