ବିଜେପି ରାଜ୍ୟ କାର୍ଯ୍ୟକାରିଣୀ ; ବିଜେଡି ମୁକ୍ତ ସରକାର ନେଇ ଆଲୋଚନା : ଲେଖାଶ୍ରୀ

ଡେସ୍କ :  ବିଜେପି ରାଜ୍ୟ କାର୍ଯ୍ୟକାରିଣୀ ବୈଠକ ଶନିବାର ଭୁବନେଶ୍ୱରରେ  ଆରମ୍ଭ ହୋଇଛି । ରାଜ୍ୟ ବିଜେପି ସଭାପତି ମନମୋହନ ସାମଲଙ୍କ ଅଧ୍ୟକ୍ଷତାରେ ବସିଥିବା ଏହି ବୈଠକରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଶ୍ୱେଶ୍ୱର ଟୁଡୁଙ୍କ ସମେତ କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ, ରାଜ୍ୟ ପ୍ରଭାରୀ ଡି.ପୁରେନ୍ଦେଶ୍ୱରୀ ପ୍ରମୁଖ ବରିଷ୍ଠ ନେତା ଉପସ୍ଥିତ ଅଛନ୍ତି ।

କାର୍ଯ୍ୟକାରିଣୀ ବୈଠକରେ ବିଜେଡି ମୁକ୍ତ ସରକାର ଗଠନ ନେଇ ଆଲୋଚନା ହୋଇଥିବା ବିଜେପି ସାଧାରଣ ସମ୍ପାଦିକା ଲେଖାଶ୍ରୀ ସାମନ୍ତ ସିଂହାର ଗଣମାଧ୍ୟମକୁ ସୂଚନା ଦେଇଛନ୍ତି । ଏହି କାର୍ଯ୍ୟକାରିଣୀ ବୈଠକରେ ରାଜ୍ୟରେ ମହିଳାଙ୍କ ଉପରେ ନିର୍ଯାତନା, ମହାନଦୀ ଜଳବିବାଦ ଘଟଣା, ମହାପ୍ରଭୁ ଜଗନ୍ନାଥଙ୍କ ଫାଇଲ ଚୋରି, ରତ୍ନଭଣ୍ଡାର ଚାବି ହଜିବା, ରାଜ୍ୟରେ କୁପୋଷଣ ତଥା ଅପପୁଷ୍ଟି ଯୋଗୁଁ ଶିଶୁଙ୍କ ବିକାଶ ବାଧାପ୍ରାପ୍ତ ଆଦି ଘଟଣାକୁ ନେଇ  ଉଦ୍‌‌ବେଗ ପ୍ରକାଶ ପାଇଥିବା ସେ ସୂଚନା ଦେଇଛନ୍ତି । ସେହିପରି କେନ୍ଦ୍ରରେ ମୋଦୀ ସରକାରଙ୍କ ୯ବର୍ଷ ପୂର୍ତ୍ତି ଏବଂ ରାଜ୍ୟରେ କେନ୍ଦ୍ର ସରକାରଙ୍କ ବିଭିନ୍ନ ଯୋଜନାର କାର୍ଯ୍ୟକାରିତାକୁ ନେଇ ବୈଠକରେ ଆଲୋଚନା ହୋଇଛି । ମୋଦୀ ସରକାରଙ୍କ ୯ବର୍ଷ ପୂର୍ତ୍ତି ଅବସରରେ ‘ମହା-ଜନସମ୍ପର୍କ ଅଭିଯାନ’ ମାଧ୍ୟମରେ ଓଡ଼ିଶାର ଘରେ ଘରେ ୧ କୋଟି ପରିବାର ପାଖରେ ପହଞ୍ଚିବା ପାଇଁ ଯୋଜନା କରାଯାଇଥିବା ସଂପର୍କରେ ​ସେ ସୂଚନା ଦେଇଛନ୍ତି । ରାଜ୍ୟର ସମସ୍ତ ସାଂସଦ ଓ ବିଧାୟକ, ରାଷ୍ଟ୍ରୀୟ ପଦାଧିକାରୀ, ରାଜ୍ୟ ପଦାଧିକାରୀ, ରାଜ୍ୟ କାର୍ଯ୍ୟକାରିଣୀ  ସଦସ୍ୟ, ଜିଲା ସଭାପତି, ଜିଲା ପ୍ରଭାରୀ ଏବଂ ବିଭିନ୍ନ ମୋର୍ଚ୍ଚା ସଭାପତିମାନେ ମଧ୍ୟ ବୈଠକରେ ଯୋଗ ଦେଇଛନ୍ତି ।