ଭୁବନେଶ୍ବର: ନାଟକ ସମାଜର ପ୍ରତିଫଳନ। ଆମ ଜୀବନର ପରିବେଶ, ପରିସ୍ଥିତି ଓ ସମସ୍ୟାର ଦର୍ପଣ ହେଉଛି ନାଟକ। ନିଜ ଜୀବନର କାହାଣୀକୁ ଦର୍ଶକ ନାଟକରେ ଖୋଜେ ଏବଂ ତା ସମସ୍ୟାର ସମାଧାନ ଵି ନାଟକରେ ପାଇବାକୁ ଇଛା କରେ ବୋଲି ଉତ୍କଳ ବିଶ୍ବବିଦ୍ୟାଳୟ ଇଂରାଜୀ ବିଭାଗ ପକ୍ଷରୁ ପାଳିତ ହୋଇଥିବା ‘ବିଶ୍ବ ନାଟ୍ୟ ଦିବସ’ ଅବସରରେ ଆୟୋଜିତ ଆଲୋଚନାଚକ୍ର ‘ସେକ୍ସପିୟର, ଆମର ସମସାମୟିକ’ରେ ଯୋଗଦେଇ ବକ୍ତମାନେ ପ୍ରକାଶ କରିଛନ୍ତି।
କାର୍ଯ୍ୟକ୍ରମରେ କୁଳପତି ପ୍ରଫେସର ସବିତା ଆଚାର୍ଯ୍ୟ ମୁଖ୍ୟଅତିଥି ଭାବେ ଯୋଗଦେଇ କହିଥିଲେ ଯେ ନାଟକ ସବୁବେଳେ ସମୟୋପଯୋଗୀ ଓ ସାଧାରଣ ମଣିଷର କାହାଣୀ ହେବା ଦରକାର। ତାହେଲେ ଯାଇ ନାଟକ ଦର୍ଶକ ଦୌରା ଆଦୃତ ହେବ ଓ ନାଟକ ଜୀବିତ ରହିବ ବୋଲି ପ୍ରକାଶ କରିଥିଲେ। ପ୍ରଫେସର ପ୍ରଫୁଲ୍ଲ କୁମାର ମହାନ୍ତି ମୁଖ୍ୟବକ୍ତା ଭାବେ ଯୋଗଦେଇ ‘ସେକ୍ସପିୟର, ଆମର ସମସାମୟିକ’ ବିଷୟ ଉପରେ ବକ୍ତବ୍ୟ ରଖିଥିଲେ। କଥାକାର ପ୍ରଦୋଷ ମହାନ୍ତି ନାଟକର ବିଭିନ୍ନ ଦିଗ ଓ ଏହାର ପ୍ରଭାବ ଉପରେ ଆଲୋକପାତ କରିଥିଲେ। ଆବାହକ ପ୍ରଫେସର ଅସୀମ ରଞ୍ଜନ ପାଢ଼ୀ ଓଡ଼ିଶାରେ ନାଟକ ଓ ଯାତ୍ରା ପରମ୍ପରା ଉପରେ ଆଲୋଚନା କରିଥିଲେ।
ଏହି ଅବସରରେ ବିଭାଗର ନ୍ୟୁଜ ବୁଲେଟିନ ‘ଇଂଲିଶ ଆଟ ଉତ୍କଳ’ ଉନ୍ମୋଚିତ ହୋଇଥିବାବେଳେ ଛାତ୍ରଛାତ୍ରୀଙ୍କ ଦ୍ବାରା ଏକ କ୍ଷୁଦ୍ର ନାଟକ ପରିବେଷିତ ହୋଇଥିଲା। ସେମିନାର ସମ୍ପାଦକ ପିୟୁଷ କୁଅଁର ଧନ୍ୟବାଦ ଅର୍ପଣ କରିଥିଲେ।
Comments are closed.