ସଇଁନ୍ତଲା: ଗରିବ ପରିବାର ଉପରେ ଦୁଃଖର କଳାବାଦଳ । ଜଣେ ଭିନ୍ନକ୍ଷମ ସ୍ୱାମୀ ଭିକ୍ଷା ବୃତ୍ତି ପାଇଁ ଯାଇଥିବା ବେଳେ ସ୍ତ୍ରୀ ସବୁଦିନ ପାଇଁ ଆଖି ବୁଜିଦେଇଛନ୍ତି । ଏଭଳି ଏକ ଅଭାବନୀୟ ଘଟଣା ସଇଁନ୍ତଲା ବ୍ଲକ ଗଣ୍ଡପତ୍ରାପାଲି ପଞ୍ଚାୟତର ଫଫସି ବଜାର ନିକଟରେ ଘଟିଯାଇଛି । ସୂଚନା ଅନୁସାରେ, ଗତ ୧୫ ବର୍ଷ ହେଲା ସ୍ୱାମୀ-ସ୍ତ୍ରୀ ସ୍ଥାନୀୟ ଅଞ୍ଚଳରେ ଭିକ୍ଷା ବୃତ୍ତି କରି ଚଳୁଥିଲେ । ସ୍ୱାମୀଙ୍କର ଚାଲିବାକୁ ସକ୍ଷମ ନଥିଲେ । ତିନି ଚକିଆ ଭିନ୍ନକ୍ଷମ ସାଇକେଲରେ ଗାଁରୁ ଗାଁକୁ ଯାଇ ଭିକ ମାଗୁଥିଲେ । ସ୍ତ୍ରୀଙ୍କ ଦେହ ଖରାପ ଥିବାରୁ ସ୍ୱାମୀ ଏକୁଟିଆ ଭିକ ମାଗିବାକୁ ବାହାରିଥିଲେ ।
ରବିବର ସ୍ୱାମୀ ଆସି ନଥିବା ବେଳେ ସ୍ତ୍ରୀ ଅଚେତ ଅବସ୍ଥାରେ ପଡିଥିଲେ । ସ୍ଥାନୀୟ ଲୋକେ ଏନେଇ ସରପଞ୍ଚ ମନୀଷ ସୁନାଙ୍କୁ ଖବର ଦେଇଥିଲେ । ଆମ୍ବୁଲାନ୍ସକୁ ଯୋଗାଯୋଗ କରାଯାଇଥିଲା । ଆମ୍ବୁଲାନ୍ସ ନଆସିବାରୁ ସରପଞ୍ଚ ନିଜ ଗାଡିରେ ମହିଳାଙ୍କୁ ସଇଁନ୍ତଲା ଡାକ୍ତରଖାନାକୁ ନେଇଥିଲେ । ସେଠାରେ ଚିକିତ୍ସାର କିଛି ସମୟ ପରେ ମହିଳାଙ୍କୁ ଡାକ୍ତର ମୃତ ଘୋଷଣା କରିଥିଲେ । ମହିଳାଙ୍କ ଶବକୁ ଆଣି ସରପଞ୍ଚ ଓ ସ୍ଥାନୀୟ ଲୋକେ ସତ୍କାର କରିଥିବା ଜଣାପଡିଛି । ତେବେ ଉଭୟଙ୍କ ପରିଚୟ ଜଣାପଡି ନାହିଁ । ସୋମବାର ଭିକ୍ଷା ମାଗିଯାଇଥିବା ସ୍ୱାମୀ ସ୍ତ୍ରୀଙ୍କ ମୃତ୍ୟୁ ହୋଇଯାଇଥିବା ଜାଣିବାକୁ ପାଇଛନ୍ତି ।
