ବୌଦ୍ଧ: ଜମିରେ ଚାଷ କରିବାକୁ କେନ୍ଦ୍ରକରି ଭାଗଚାଷୀଙ୍କ ଆକ୍ରମଣରେ ଜମିମାଲିକ ଗୁରୁତର ଆହତ ହୋଇଛନ୍ତି । ବୌଦ୍ଧ ଟାଉନ ଥାନା ଅନ୍ତର୍ଗତ କାଲେଶ୍ୱର ଗ୍ରାମରେ ଏଭଳି ଏକ ଅଭାବନୀୟ ଘଟଣା ଘଟିଛି । କାଲେଶ୍ୱର ଗ୍ରାମର ଯୋଗୀନ୍ଦ୍ର ବେହେରା ଗାଈ ଚରାଇ ନିଜ ଘରକୁ ଫେରୁଥିବାବେଳେ ପୂର୍ବରୁ ତାଙ୍କ ଜମି ଭାଗରେ ନେଇ ଚାଷ କରୁଥିବା ଯୁବକ ମଙ୍ଗଳୁ ନାୟକ ହଠାତ ଏକ ଟାଙ୍ଗିଆରେ ତାଙ୍କୁ ଆକ୍ରମଣ କରିଥିଲେ । ଅତର୍କିତ ଆକ୍ରମଣରେ ଯୋଗୀନ୍ଦ୍ର ଗୁରୁତର ଆହତ ହୋଇ ପଡିଯାଇଥିଲେ ।
ଗୁରୁତର ଆହତ ଅବସ୍ଥାରେ ଘର ଲୋକେ ଉଦ୍ଧାରକରି ତାଙ୍କୁ ବୌଦ୍ଧ ଡାକ୍ତରଖାନାରେ ଭର୍ତ୍ତି କରିଥିଲେ । ଦେହ ଅଧିକ ଗୁରୁତର ହେବାରୁ ଯୋଗୀନ୍ଦ୍ରଙ୍କୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି । ସୂଚନା ପ୍ରକାରେ ଯୋଗୀନ୍ଦ୍ରଙ୍କ ଚାଷ ଜମି ଠିକାରେ ନେଇ ମଙ୍ଗଳୁ ଚାଷ କରିଆସୁଥିଲା । ଚଳିତ ବର୍ଷ ମଙ୍ଗଳୁ ଚାଷନକରି ଯୋଗୀନ୍ଦ୍ରଙ୍କ ସହିତ ପୂର୍ବରୁ ଝଗଡା କରିଥିଲେ । ଗ୍ରାମବାସୀଙ୍କ ବୁଝାସୁଝା ପରେ ମାମଲାର ସମାଧାନ ହୋଇଯାଇଥିଲା । ଆଜି କୌଣସି କାରଣରୁ ମଙ୍ଗଳୁ ଉତ୍ୟକ୍ତ ହୋଇ ହଠାତ ଯୋଗୀନ୍ଦ୍ର ଉପରେ ଆକ୍ରମଣ କରି ଲହୁଲୁହାଣ କରିଦେଇଥିଲା । ଏନେଇ ଯୋଗୀନ୍ଦ୍ରଙ୍କ ପରିବାର ପକ୍ଷରୁ ଥାନାରେ ଅଭିଯୋଗ କରାଯାଇଛି । ପୁଲିସ ଘଟଣାର ତଦନ୍ତ କରୁଥିବା ଜଣାପଡିଛି ।
Comments are closed.