ପୋଙ୍ଗୟାଙ୍ଗ – କୋଭିଡ୍ ପରେ ଉତ୍ତରକୋରିଆରେ ଆଉଏକ ମହାମାରୀ ବ୍ୟାପିଥିବା କଥା ସୂଚନା ମିଳିଛି । ଏଥିରେ ଲୋକମାନଙ୍କର ପେଟ ସମସ୍ୟା ଦେଖା ଯାଉଥିବା ଉତ୍ତରକୋରିଆ ପକ୍ଷରୁ ସୂଚନା ଦିଆଯାଇଛି । ଆକ୍ରାନ୍ତ ବ୍ୟକ୍ତିମାନଙ୍କର କ୍ଷୁଦ୍ରାନ୍ତରେ ସମସ୍ୟା ଦେଖାଉଛି । ଅନ୍ତନାଡୀରେ ସଂକ୍ରମଣ ଯୋଗୁଁ ଲୋକମାନେ ପ୍ରବଳ କଷ୍ଟ ପାଉଛନ୍ତି । ଜୁନ୍ ୧୬ ତାରିଖରେ ଉତ୍ତରକୋରିଆ ପକ୍ଷରୁ ଏହି ସୂଚନା ଦିଆଯାଇଛି ।
ମାତ୍ର ଏହା କେତେ ଭୟାନକ ସେ ବିଷୟରେ କୌଣସି ସୂଚନା ଦିଆଯାଇ ନାହିଁ । ଉତ୍ତରକୋରିଆର ଶାସକ କିମ୍ ତାଙ୍କ ପରିବାର ପାଇଁ ସଂରକ୍ଷିତ ଥିବା ବିଭିନ୍ନ ଔଷଧ ଆକ୍ରାନ୍ତଙ୍କ ଚିକିତ୍ସା ପାଇଁ ଦାନ କରିଥିବା ସେଠାକାର ସରକାରୀ ଖବରସଂସ୍ଥା ପକ୍ଷରୁ ସୂଚନା ଦିଆଯାଇଛି । କୋରିଆନ୍ ସେଣ୍ଟ୍ରାଲ୍ ନ୍ୟୁଜ୍ ଏଜେନ୍ସି ପକ୍ଷରୁ ଏ ବିଷୟରେ ଖବର ପ୍ରକାଶିତ କରାଯାଇଛି । ଆକ୍ରାନ୍ତଙ୍କ ନିକଟରେ ଟାଇଫଏଡ୍, ଡିସେଣ୍ଟ୍ରି ଏବଂ କଲେରା ପରି ଲକ୍ଷଣ ଦେଖାଯିବା ସହ ପେଟରେ ଯନ୍ତ୍ରଣା ହେଉଛି ।
ପ୍ରଦୂଷିତ ଖାଦ୍ୟ ଏବଂ ପାଣିରେ ଏହା ବ୍ୟାପୁଥିବା ଅନୁମାନ କରାଯାଉଛି । ଏପରି ରୋଗ ସାଧାରଣତଃ ଉତ୍ତରକୋରିଆରେ ବାରମ୍ବାର ବ୍ୟାପିଥାଏ । ସେଠାରେ ପାନୀୟ ଜଳ ଯୋଗାଣ ଏବଂ ସ୍ୱାସ୍ଥ୍ୟ ସେବା କ୍ଷେତ୍ର ୧୯୯୦ରୁ ବିପର୍ଯ୍ୟସ୍ତ ଅବସ୍ଥାରେ ରହିଛି । ଲୋକମାନଙ୍କୁ ଉପଯୁକ୍ତ ଚିକିତ୍ସା ମିଳୁ ନଥିବା ଅଭିଯୋଗ ହୋଇଛି।
