ବେଗୁନିଆ: ବେଗୁନିଆ ବ୍ଲକ ପଙ୍ଗାରସିଂହ ଦଧିବାମନଦେବ ସରକାରୀ ଉଚ୍ଚ ବିଦ୍ୟାଳୟଠାରେ ବିଦ୍ୟାର୍ଥୀର ବୌଦ୍ଧିକ ବିକାଶରେ ସମ୍ବାଦପତ୍ରର ଭୂମିକା ଶୀର୍ଷକ ଆଲୋଚନାଚକ୍ର ସମ୍ବାଦପତ୍ର ପ୍ରଦର୍ଶନ ତଥା ଖବରକାଗଜରୁ ବହି ପ୍ରଦର୍ଶନୀ ଅନୁଷ୍ଠିତ ହୋଇଯାଇଛି । ସମ୍ବାଦପତ୍ର ପ୍ରଦର୍ଶନୀରେ ଓଡ଼ିଆ, ହିନ୍ଦୀ, ବଙ୍ଗଳା, ଅସମୀୟା, ମରାଠୀ, ଗୁଜୁରାଟୀ, ତେଲୁଗୁ, ତାମିଲ, ମାଲୟଲମ, ସାନ୍ତାଳୀ, ନେପାଳି ଏବଂ ଇଂରାଜୀ ଆଦି ଭାଷାରେ ପ୍ରକାଶିତ ୨୨୬ ଟି ଭିନ୍ନ ଭିନ୍ନ ସମ୍ବାଦପତ୍ର ପ୍ରଦର୍ଶିତ ସହ ୧ଶହଟି ଖବରକାଗଜରୁ ବହି ସ୍ଥାନିତ କରାଯାଇଛି। ଆୟୋଜିତ ଏହି ଆଲୋଚନା ଚକ୍ରରେ ବିଦ୍ୟାଳୟର ପ୍ରଧାନଶିକ୍ଷକ ଉପେନ୍ଦ୍ର ଦାଶ ସଭାପତିତ୍ୱ କରିଥିଲେ । ମୁଖ୍ୟ ଅତିଥି ଶିକ୍ଷାବିତ ହରିଦାଶ ପଣ୍ଡା, ମୁଖ୍ୟବକ୍ତା ପଣ୍ଡିତ ଦାଶରଥି ସୁବୁଦ୍ଧି, ସମ୍ମାନିତ ଅତିଥି ବାବୁଲି ଦାସ ଓ ପ୍ରତାପରୁଦ୍ର ପରିଡା ଯୋଗ ଦେଇ ସମ୍ବାଦପତ୍ର ପଠନର ଆବଶ୍ୟକତା ଓ ଗୁରୁତ୍ୱ ଉପରେ ଆଲୋଚନା କରିଥିଲେ । ବଳରାମ ରଣସିଂହ ଆଲୋଚନାଚକ୍ର ଉପରେ ବିବରଣୀ ପ୍ରଦାନ କରିଥିଲେ ।ସମ୍ବାଦପତ୍ର ବିଦ୍ୟାର୍ଥୀର ଜ୍ଞାନର ପରିସରକୁ ବ୍ୟାପକ କରିଥାଏ ଏବଂ ଏକ ଉତ୍ତମ ବ୍ୟକ୍ତିତ୍ୱ ଗଠନ ଦିଗରେ ସହଯୋଗ କରିଥାଏ ବୋଲି ମତ ପ୍ରକାଶ କରିଥିଲେ ।ଛାତ୍ରର ଜୀବନ ତପସ୍ୱୀ ଜୀବନ ସହ ତୁଳନୀୟ । ସାଧନା ହିଁ ସିଦ୍ଧି ଦେଇଥାଏ । ସମ୍ବାଦପତ୍ର ବିଦ୍ୟାର୍ଥୀର ଜ୍ଞାନର ପରିସରକୁ ପ୍ରଜ୍ବଳିତ କରିଥାଏ । ଏହି ଆଲୋଚନା ଚକ୍ରରେ ନିରଂଜନବେହେରା ସ୍ୱାଗତ ଭାଷଣ ପ୍ରଦାନ କରିଥିଲା ବେଳେ ଚିନ୍ମୟ ଚମ୍ପତ୍ତି ଅତିଥି ପରିଚୟ ପ୍ରଦାନ କରିଥିଲେ । ଅଂଶୁମାନ ଧନ୍ୟବାଦ ଅର୍ପଣ କରିଥିଲେ।
Popular Categories
Previous article
Next article