ଭୁବନେଶ୍ବର: ବହୁଚର୍ଚ୍ଚିତ କ୍ୟାମେରାମ୍ୟାନ୍ ମାନସ ସ୍ବାଇଁ ହତ୍ୟା ମାମଲା । ଘଟଣା ଉପରୁ ଧୀରେ ଧୀରେ ହଟୁଛି ପରଦା । ଘଟଣାକୁ ନେଇ ପୂର୍ବରୁ ଅନେକ ଚାଞ୍ଚଲ୍ୟକର ତଥ୍ୟ ସାମ୍ନକୁ ଆସିଥିବା ବେଳେ ପୁଣି ଏକ ତଥ୍ୟ ସମ୍ନାକୁ ଆସିଛି । ମୁଖ୍ୟ ଅଭିଯୁକ୍ତ କୁହାଯାଉଥିବା ଶର୍ମିଷ୍ଠା ରାଉତଙ୍କ କାର୍ ବର୍ତ୍ତମାନ ଏୟାରଫିଲ୍ଡ ଥାନା ସ୍କାଏ ଟାୱାର ଆପାର୍ଟମେଣ୍ଟ ଗ୍ୟାରେଜରୁ ଠାବ କରାଯାଇଛି । କୁହାଯାଉଛି କି ଏହି କାରରେ ମାନସଙ୍କୁ ଚାନ୍ଦବାଲିରୁ ଉଠାଇ ନେଇଥିଲା । ପରେ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।
ପୂର୍ବରୁ ଏହି ହତ୍ୟା ମାମଲାରେ ସୋମବାର ଦିନ ଚାନ୍ଦବାଲି ପୁଲିସ ଆଉ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି । ସୂଚନା ଓ ଲୋକସଂପର୍କ ବିଭାଗର ଅବସରପ୍ରାପ୍ତ ଅଧିକାରୀ ନିରଞ୍ଜନ ସେଠୀ ଓ ଅନ୍ୟ ଜଣେ ଅଭିଯୁକ୍ତ ରଞ୍ଜନ ନାୟକଙ୍କୁ ଗିରଫ କରାଯାଇଛି । ହତ୍ୟା ଷଡ଼ଯନ୍ତ୍ର, ମାଡ଼ ମାରିବା ଓ ମୃତଦେହ ପୋତିବାରେ ଉଭୟ ନିରଞ୍ଜନ ଓ ରଞ୍ଜନ ସମ୍ପୃକ୍ତ ଥିଲେ। ଜିଲ୍ଲା ଅତିରିକ୍ତ ଏସପି ଯତୀନ ପଣ୍ଡା ଚାନ୍ଦବାଲି ଥାନା ପରିସରରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏନେଇ ସୂଚନା ଦେଇଥିଲେ ।
