ଗାଜିପୁର: ଉତ୍ତରପ୍ରଦେଶର ଗାଜିପୁର ଜିଲାର ମରଦହ ଥାନା ଅନ୍ତର୍ଗତ ଡୋଡସର ଗାଁରେ ବଡ଼ ଭାଇକୁ ପିଟି ପିଟି ହତ୍ୟା କରିଛି ସାନ ଭାଇ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏଥିସହ ହତ୍ୟାକାରୀ ସାନ ଭାଇକୁ ଗିରଫ କରିଛି।
ସୂଚନା ମୁତାବକ, ନହ୍ନକୁ ଯାଦବଙ୍କ ୨୨ ବର୍ଷୀୟ ପୁଅ ଧର୍ମେନ୍ଦ୍ର ଯାଦବ ନିଶା ସେବନ କରନ୍ତି। ଅଧିକାଂଶ ସମୟରେ ଧର୍ମେନ୍ଦ୍ର ବାହାରେ ରହୁଥିଲେ। ସୋମବାର ସେ ଘରକୁ ଆସିବା ପରେ ତାଙ୍କ ମାଆ ବିମଳା ଦେବୀ ସାନପୁଅ ରାକେଶ ଯାଦବ ସହିତ ଘରର କିଛି ମରାମତି କାମ କରୁଥିଲେ। ଏଠାରେ ଉଲ୍ଲେଖଯୋଗ୍ୟ ଯେ, ବିମଳା ଦେବୀ ସାନ ପୁଅ ସହ ସେହି ଘରେ ରୁହନ୍ତି। ଏହି ସମୟରେ ଧର୍ମେନ୍ଦ୍ର ସେଠାରେ ପହଞ୍ଚିଥିଲେ ଓ ଘର ମରାମତି କଥାକୁ ନେଇ ମାଆ ଓ ସାନ ଭାଇ ସହ ଝଗଡ଼ା କରିଥିଲେ। ଦେଖୁ ଦେଖୁ ଝଗଡ଼ା ମାଡ଼ଗୋଳରେ ପରିଣତ ହୋଇଗଲା। ରାକେଶ ଏକ ଲୁହା ଦଣ୍ଡରେ ଧର୍ମେନ୍ଦ୍ରଙ୍କୁ ଆକ୍ରମଣ କରିଥିଲା। ଫଳରେ ଧର୍ମେନ୍ଦ୍ରଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା ଓ ସେ ଲହୁଲୁହାଣ ହୋଇ ତଳେ ପଡ଼ିଯାଇଥିଲେ। ପାଟିତୁଣ୍ଡ ଶୁଣି ପଡ଼ୋଶୀ ସେଠାରେ ପହଞ୍ଚି ଗୁରୁତର ଅବସ୍ଥାରେ ଧର୍ମେନ୍ଦ୍ରଙ୍କୁ ଡାକ୍ତରଖାନା ନେଇଥିଲେ। ମାତ୍ର ରାସ୍ତାରେ ଧର୍ମେନ୍ଦ୍ରଙ୍କର ମୃତ୍ୟୁ ଘଟିଥିଲା। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମାଆର ଅଭିଯୋଗ ଆଧାରରେ ବଡ଼ ପୁଅର ହତ୍ୟା ଅଭିଯୋଗରେ ସାନ ପୁଅକୁ ଗିରଫ କରିଛି।
Comments are closed.