ମାଘ ସପ୍ତମୀରେ ବଡସିଂହାର ବେଶରେ ଦର୍ଶନ ଦେଲେ ବାବା ଆଖଣ୍ଡଳମଣି, କୋଭିଡ କଟକଣା ମଧ୍ଯରେ ଦର୍ଶନ କଲେ ଶ୍ରଦ୍ଧାଳୁ

ଆରଡି: ବାବା ଆଖଣ୍ଡଳମଣିଙ୍କ ପୀଠରେ ପ୍ରଚଳିତ ବିରଜା ପଞ୍ଜିକା ଅନୁଯାୟୀ ପବିତ୍ର ମାଘ ମାସ ଶେଷ ସୋମବାର ଓ ମାଘସପ୍ତମୀ ଅବସରରେ ବଡସିଂହାର ବେଶରେ ସଜ୍ଜିତ ହୋଇଥିଲେ ମଣିବାବା। ମଣିବାବାଙ୍କୁ ଦର୍ଶନ କରିବା ପାଇଁ ରାଜ୍ୟର ବିଭିନ୍ନ ପ୍ରାନ୍ତରରୁ ଆସିଥିବା ଶ୍ରଦ୍ଧାଳୁ ଭକ୍ତମାନେ କୋଭିଡ କଟକଣା ପାଳନ କରି ମନ୍ଦିର ଭିତରକୁ ଯାଇ ଦର୍ଶନ କରିଥିଲେ। ଅନ୍ୟପଟେ ଭୋର ୪ଟାରେ ମନ୍ଦିର ଦ୍ବାରଫିଟା ଯିବା ପରେ ମଙ୍ଗଳ ଆଳତୀ, ମହାସ୍ନାନ, ଘର୍ଷଣଲାଗି ନୀତି ସମ୍ପନ୍ନ ହେବା ପରେ ଦିଗମ୍ବର ବେଶରେ ସଜ୍ଜିତ କରାଯାଇଥାଏ। ଏହି ଅବସରରେ ବାବା ଆଖଣ୍ଡଳମଣିଙ୍କଠାରେ ପହିଲି ବାଲ୍ୟଭୋଗ ଲାଗି କରାଯାଇଥିଲା।

ଏହାପରେ କୋଭିଡ ନିୟମ ଅନୁଯାୟୀ ସକାଳ ୬ଟାରୁ ରାତ୍ର ୮ଟା ଯାଏଁ ଶ୍ରଦ୍ଧାଳୁଭକ୍ତଙ୍କ ଦର୍ଶନ ପାଇଁ ସାହାଣମେଲା କରାଯାଇଥିଲା। ଶ୍ରଦ୍ଧାଳୁଭକ୍ତ କୋଭିଡ ନିୟମ ପାଳନ କରି ମଣିବାବାଙ୍କୁ ଦର୍ଶନ କରିବା ସହ ସେବାୟତଙ୍କ ଦ୍ବାରା ଭୋଗ ଲାଗି କରାଇଥିଲେ। ସମସ୍ତ ସକାଳ ନୀତିକାନ୍ତି ଅପରାହ୍ଣ ୩ଟା ସୁଧା ସରିବା ପରେ ୪ଟାରେ ବିଭିନ୍ନ ଅଳଙ୍କାର ଓ ଫୁଲ ଚନ୍ଦନ ଦ୍ବାରା ମଣିବାବାଙ୍କୁ ବଡସିଂହାର ବେଶରେ ସଜ୍ଜିତ କରାଯାଇ ସଂନ୍ଧ୍ୟା ନୀତିକାନ୍ତି କରାଯାଇଥିଲା।