ଗୋପାଳପୁର : ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରାଯାଉଥିଲେ ମଧ୍ୟ ଠିକାଦାର ଓ ବିଭାଗୀୟ ଅଧିକାରୀଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁଁ ନିମ୍ନ ମାନର କାମ ହେବା ସହ ଅନେକ ରାସ୍ତା ଶୋଚନୀୟ ଅବସ୍ଥାକୁ ଚାଲି ଆସିଥିବା ଦେଖିବାକୁ ମିଳିଛି । ଏହି କ୍ରମରେ ଗ୍ରାମ୍ୟ ଉନ୍ନୟନ ମନ୍ତାଣଳୟ ପକ୍ଷରୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଗୋପାଳପୁର ଠାରୁ ମନସୁରକୋଟା ପର୍ଯ୍ୟନ୍ତ ୫ କିମି ରାସ୍ତା ନିର୍ମାଣ ନିମନ୍ତେ ୧୬୫.୯୪ ଲକ୍ଷ ଟଙ୍କା ଅନୁଦାନ ପ୍ରଦାନ କରାଯାଇଥିଲା। ଏହି ଅନୁଦାନ ରାଶିକୁ ଓଡିଶା ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଟେଣ୍ଡର କରାଯାଇ ଠିକାଦାର ଙ୍କୁ କାର୍ଯ୍ୟାଦେଶ ପ୍ରଦାନ କରାଯିବା ସହ ଗତ ୧୯/୦୯/୨୦୧୯ ରୁ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଏହା ମଧ୍ୟରେ ଗତ ୧୮/୦୬/୨୦ ରେ ରାସ୍ତା ନିର୍ମାଣ କାର୍ଯ୍ୟ ସମାପ୍ତ ହୋଇଥିବା ନେଇ ମନସୁରକୋଟା ରାସ୍ତାରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଲଗା ଯାଇଥିବା ଫଳକ ରେ ଉଲ୍ଲେଖ କରାଯାଇଛି । କିନ୍ତୁ ରାସ୍ତା ନିର୍ମାଣ ହେବାର ୬ ମାସ ମଧ୍ୟରେ ରାସ୍ତାର ଅନେକ ସ୍ଥାନରେ ପିଚୁ ଉଠି ଯିବା ସହ ରାସ୍ତା ଦବି ଯାଇଥିବା ଦେଖିବାକୁ ମିଳିଛି । ସୂଚନାଯୋଗ୍ୟ ଯେ ସ୍ବାଧୀନତାର ୭୨ ବର୍ଷ ପରେ ମନସୁରୁକୋଟା ଗ୍ରାମକୁ କଚା ସଡକ ସହ ସଂଯୋଗ କରାଯାଇଥିଲା। ଏହା ପୂର୍ବରୁ କେବଳ ମାଟି ଓ ମେଟାଲ ସଡକ ହଁ ଯୋଗାଯୋଗ ନିମନ୍ତେ ରହି ଆସିଥିଲ।ପକ୍କା ସଡକ ନିର୍ମାଣ ନିମନ୍ତେ ଗ୍ରାମବାସୀଙ୍କ ପକ୍ଷରୁ ଅନେକ ଥର ଦାବି ଉପସ୍ଥାପନ ପରେ ବିଧାୟକ ଡ଼ ପ୍ରଦିପ ପାଣିଗ୍ରାହୀଙ୍କ ପକ୍ଷରୁ ଗତ ୨୦୧୯ ମସିହାରେ ଏହି ରାସ୍ତା କାର୍ଯ୍ୟ ନିର୍ମାଣ ନିମନ୍ତେ ଭିତ୍ତି ଦିଆଯିବା ସହ ରାସ୍ତା କାମ ଆରମ୍ଭ କରାଯାଇଥିଲା । ଘଟଣା ନେଇ ଗ୍ରାମ୍ୟ ଉନ୍ନୟନ ବିଭାଗ ଏସଡିଓ ସନ୍ଦିପ ଜେନାଙ୍କ ଦୃଷ୍ଟି ଆକର୍ଷଣ କରାଯିବା ପରେ ସେ ଗତ କିଛି ଦିନ ହେଲା ଏଠାରେ ଦାୟିତ୍ଵ ଗ୍ରହଣ କରିଥିବାରୁ ବିଭାଗୀୟ କନିଷ୍ଠ ଯନ୍ତ୍ରୀଙ୍କୁ ପଠାଇ ରାସ୍ତା ର ତଦାରଖ କରିବା ସହ ତୁରନ୍ତ ଠିକାଦାରଙ୍କୁ କହି ରାସ୍ତାର ମରାମତି କରିବେ ବୋଲି ପ୍ରକାଶ କରିଛନ୍ତି।
