ପିପିଲି: ପିପୁଲ ଫର ସେବା ସଂସ୍ଥାର ସମାଜସେବୀମାନେ ଭୁବନେଶ୍ୱର-ପୁରୀ ଜାତୀୟ ରାଜପଥରେ ବୁଲୁଥିବା ଜଣେ ବୟସ୍କ ବ୍ୟକ୍ତିଙ୍କୁ ଉଦ୍ଧାର କରି ଥାନାରେ ଆଶ୍ରୟ ଦେଇଛନ୍ତି । ପିପିଲି ବ୍ଲକ ଅନ୍ତର୍ଗତ ତେଇସିପୁର ବଜାର ଠାରେ ରାସ୍ତା କଡରେ ଏକ ବାଲିଗଦାରେ ଜଣେ ଅପରିଚିତ ବୃଦ୍ଧ ବ୍ୟକ୍ତି ଶୋଇଥିବାର ଦେଖିବାକୁ ମିଳିଥିଲା। ଏ ସମ୍ପର୍କରେ ଶନିବାର ସଂନ୍ଧ୍ୟାରେ କେତେକ ଲୋକେ ପିପୁଲ ଫର ସେବା ସଂସ୍ଥାକୁ ଖବର ଦେଇଥିଲେ। ଯୁବ ସମାଜସେବୀ ପ୍ରକାଶ କୁମାର ସାହୁଙ୍କ ସମେତ ସଂସ୍ଥାର ଅନ୍ୟ କର୍ମକର୍ତ୍ତାମାନେ ସେଠାରେ ପହଞ୍ଚି ଉକ୍ତ ବୃଦ୍ଧଙ୍କୁ ଉଦ୍ଧାର କରି ପିପିଲି ଥାନାକୁ ଆଣିଥିଲେ।
ଏହି ବୃଦ୍ଧ ବ୍ୟକ୍ତିଙ୍କୁ ବହୁ ସମୟ ଧରି ପଚରାଉଚୁରା କରିବା ପରେ ତାଙ୍କ ଘର ଜଗତସିଂହପୁର ଜିଲା ତିର୍ତ୍ତୋଲ ଅଞ୍ଚଳରେ ହୋଇଥିବା ଜଣାପଡିଥିଲା। ପିପିଲି ଆଇଆଇସି ଅଭିମନ୍ୟୁ ନାୟକ ତିର୍ତ୍ତୋଲ ଥାନା ସହ ଯୋଗାଯୋଗ କରିବା ପରେ ତାଙ୍କ ପରିବାରକୁ ଖବର ଦିଆଯାଇଛି। ବୃଦ୍ଧବ୍ୟକ୍ତିଙ୍କୁ ଥାନା ପରିସରରେ ଆଇଆଇସି ଆଶ୍ରୟ ଦେଇଥିବାବେଳେ ତାଙ୍କୁ ନେବାକୁ କେହି ନ ଆସିଲେ ବୃଦ୍ଧାଶ୍ରମରେ ଛଡ଼ାଯିବ ବୋଲି ପିପିଲି ଆଇଆଇସି ସୂଚନା ଦେଇଛନ୍ତି। ପିପୁଲ ଫର ସେବା ସଂସ୍ଥାର ଏହି ସମାଜସେବାକୁ ବିଭିନ୍ନ ମହଲରୁ ସ୍ୱାଗତ କରାଯାଇଛି।
