କଟକ : ଓଡ଼ିଶା ରାଜ୍ୟ ଟେବୁଲଟେନିସ ଆସୋସିଏସନ ଆନୁକୂଲ୍ୟରେ କଟକର ଜବାହାରଲାଲ ନେହରୁ ଇନ୍ଡୋର ଷ୍ଟାଡ଼ିୟମରେ ୨୭ତମ ରାଜ୍ୟ ଟେବୁଲଟେନିସ ଚମ୍ପିଆନସିପ୍ ଆରମ୍ଭ ହୋଇଛି। ଶୁକ୍ରବାର ପ୍ରଥମ ଦିବସରେ ୧୭ ବର୍ଷରୁ କମ୍ ବାଳିକା ଫାଇନାଲରେ ଗୁରୁ ନାନକ ପବ୍ଳିକ ସ୍କୁଲର ଶ୍ବେତ ପଦ୍ମା ଦଳାଇ ଓ ଖୋର୍ଦ୍ଧାର ସୁଶ୍ରୀ ପଟ୍ଟନାୟକ ପ୍ରବେଶ କରିଛନ୍ତି। ସେମିଫାଇନାଲରେ ଶ୍ବେତ ପଦ୍ମା (୪-୦)୧୧-୩, ୧୧-୨, ୧୨-୫ ଓ ୧୧-୪ରେ ଭୁବନେଶ୍ବରର ଏମ.ବି .ବି ପଣ୍ଡାଙ୍କୁ ଓ ସୁଶ୍ରୀ (୪-୦) ୧୧-୭, ୧୧-୬, ୧୧-୨ ଓ ୧୧-୭ରେ ବୈଶାଖୀ ବଳଙ୍କୁ ପରାସ୍ତ କରି ଫାଇନାଲରେ ପହଞ୍ଚିଛନ୍ତି।
୧୧ ବର୍ଷରୁ କମ୍ ବାଳକ ଫାଇନାଲରେ କଟକର ଶୁଭଙ୍କର ମହାଳି ଓ ଆରୁଷ ମାନିଆ ପହଞ୍ଚିଛନ୍ତି। ସେମିଫାଇନାଲରେ ଶୁଭଙ୍କର (୩-୦) ୧୧-୬, ୧୧-୬ ଓ ୧୧-୫ରେ ପୁରୀର ଜିଜ୍ଞାଶୁ ପ୍ରଧାନଙ୍କୁ ଓ ଆରୁଷ (୩-୨) ୯-୧୧, ୧୧-୯, ୧୧-୫ ଓ ୧୧-୪ରେ ଜାଏଦ୍ ଖାନଙ୍କୁ ପରାସ୍ତ କରିଥିଲେ। ପ୍ରତିଯୋଗିତାରେ ୧୮ଟି ଜିଲା ଓ ପ୍ରତିଷ୍ଠାନରୁ ମୋଟ ୨୫୦ଜଣ ପ୍ରତିଯୋଗୀ ଅଂଶଗ୍ରହଣ କରିଛନ୍ତି। ପ୍ରତିଯୋଗିତାକୁ ଓଡ଼ିଶା ରାଜ୍ୟ ଟେବୁଲଟେନିସ ଆସୋସିଏସନ ସାଧାରଣ ସମ୍ପାଦକ ରବୀନ୍ଦ୍ର କୁମାର ପରିଡ଼ା ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଆସୋସିଏସନର ଉପ ସଭାପତି ଚିତ୍ତରଞ୍ଜନ ମହାନ୍ତି, ଯୁଗ୍ମ ସମ୍ପାଦକ ଜୟଦିତ୍ ଦେବତା, କୋଷାଧ୍ୟକ୍ଷ ନିହାର ରଞ୍ଜନ ମିଶ୍ର ଉପସ୍ଥିତ ଥିଲେ। ଆର. କ୍ରିଷ୍ଣା କୁମାର (ବ୍ଳୁ ବ୍ରିଗେଡ୍ ଆଇ.ୟୁ) ମୁଖ୍ୟ ରେଫରୀ ଭାବେ ପ୍ରତିଯୋଗିତା ପରିଚାଳନା କରୁଛନ୍ତି। ପ୍ରତିଯୋଗିତା ନଭେମ୍ବର ୨ ପର୍ଯ୍ୟନ୍ତ ଚାଲିବ।
