ରେଙ୍ଗାଲି: ରେଙ୍ଗାଲି ନିକଟସ୍ଥ ପଣ୍ଡଲୋଇ ଠାରେ ଥିବା ଶ୍ୟାମ୍ ମେଟାଲିକ୍ସ କାରଖାନାର ସୁରକ୍ଷାକର୍ମୀଙ୍କ ଗୁଳିମାଡରେ ବେଙ୍ଗଡୁଲୁ ଭୁୟାଁ ନାମକ ଜନୈକ ଯୁବକର ମୃତ୍ୟୁ ହୋଇଥିବା ଜଣାପଡିଛି। ମୃତ ଯୁବକ ଝାରସୁଗୁଡା ଜିଲ୍ଲା ଲହଣ୍ଡାବୁଡର ବାସିନ୍ଦା। ଗତ କିଛିଦିନ ହେଲା ସେ ନିସାନଭଙ୍ଗା ଗ୍ରାମରେ ଥିବା ତାଙ୍କ ମାଉସୀ ଘରକୁ ଆସିଥିଲେ। ମୃତକର ମାଉସୀ ଘର ସୁତ୍ରରୁ ପ୍ରାପ୍ତ ସୂଚନାରୁ ପ୍ରକାଶ ଯେ ବେଙ୍ଗଡୁଲୁ ଭୁୟାଁ ଆଜି ଦିନ ପ୍ରାୟ ୧ଟା ୩୦ ମିନିଟ୍ ସମୟରେ ଶ୍ୟାମ ମେଟାିଲିକ୍ସ ପାଚେରୀ ପାର୍ଶ୍ବରେ ବୁଲାବୁଲି କରୁଥିବା ବେଳେ କାରଖାନାର ସୁରକ୍ଷା କର୍ମୀ ତାକୁ ଚୋର ଭାବି ଗୁଳି ଚାଳନା କରିଥିଲେ। ସୁରକ୍ଷାକର୍ମୀଙ୍କ ଗୁଳି ବେଙ୍ଗଡୁଲୁର ବାମ ଗୋଡରେ ଗୁଳି ବାଜି ଗୁରୁତର ଆହତ ହୋଇ ପ୍ରଚୁର ରକ୍ତତ୍ସାବ ହେବାରୁ ମାଉସୀ ଘରକୁ ଫୋନ୍ କରି ଘଟଣା ସଂକ୍ରାନ୍ତରେ ସୂଚନା ଦେଲାପରେ ମାଉସୀଙ୍କ ପରିବାର ଲୋକେ ତାଙ୍କୁ ଘଟଣାସ୍ଥଳରୁ ଉଦ୍ଧାର କରି ଘରକୁ ନେଇଥିଲେ।
ଘରେ ଗୋଡରୁ ଗୁଳି ବାହାର କରିବାକୁ ଉଦ୍ୟମ କଲା ବେଳେ ଆହୁରି ରକ୍ତତ୍ସାବ ହେବାରୁ ବେଙ୍ଗଡୁଲୁକୁ ସନ୍ଧ୍ୟା ପ୍ରାୟ ସାଢେ ୬ଟା ସମୟରେ ଗୁରୁତର ଅବସ୍ଥାରେ ରେଙ୍ଗାଲି ଡାକ୍ତରଖାନାକୁ ଅଣାଯାଇଥିଲା। ଅବସ୍ଥା ସଙ୍କଟାପନ୍ନ ଥିବାରୁ ସେଠାରୁ ତାକୁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ।
Comments are closed.