ରେଙ୍ଗାଲିକେମ୍ପ: ଅତାବିରା ଏନଏସି ଅଧୀନରେ ଥିବା ଲାଦେରାପାଲି ଖେଳ ପଡିଆଠାରେ ଗ୍ରାମବାସୀଙ୍କ ଆନୁକୁଲ୍ୟରେ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଏକଦିବସୀୟ ଫୁଟବଲ ଟୁର୍ଣ୍ଣାମେଣ୍ଟ ଅନୁଷ୍ଠିତ ହୋଇଯାଇଛି। ଅତାବିରା ଅତିରିକ୍ତ ତହସିଲଦାର ତଥା ଏନଏସି କାର୍ଯ୍ୟ ନିର୍ବାହୀ ଅଧିକାରୀ ଶୌର୍ଯ୍ୟ ରଞ୍ଜନ ମିଶ୍ର ମୁଖ୍ୟ ଅତିଥି ଭାବେ ଯୋଗଦେଇ ଏହାକୁ ଉଦଘାଟନ କରିଥିଲେ। ଏହି ଟୁର୍ଣ୍ଣାମେଣ୍ଟରେ ଅଞ୍ଚଳର ବିଭିନ୍ନ ପ୍ରାନ୍ତରୁ ୮ଟି ଦଳ ଅଂଶଗ୍ରହଣ କରିଥିଲେ। ପ୍ରତ୍ୟେକ ଦଳର ଖେଳାଳିଙ୍କ ସହ ହାତ ମିଳାଇ ଅଭିନନ୍ଦନ ଜଣାଇ ଉତ୍ସାହିତ କରିଥିଲେ। ଶେଷରେ ସମ୍ବଲପୁର ଓ ପଡ଼ିଆବାହଲ ମଧ୍ୟରେ ଫାଇନାଲ ଖେଳ ହୋଇଥିଲା ଓ ଏଥିରେ ୧/୦ରେ ପଡ଼ିଆବାହାଲ୍ ବିଜୟୀ ହୋଇ ଚାମ୍ପିଅନ ହୋଇଥିଲା।
ଏହି ଟୁର୍ଣ୍ଣାମେଣ୍ଟର ଉଦଯାପନୀ ଉତ୍ସବରେ ରାଜ୍ୟ ବିଜେଡି ମହିଳା ସଭାପତି ତଥା ସ୍ଥାନୀୟ ବିଧାୟିକା ସ୍ନେହାଙ୍ଗିନୀ ଛୁରିଆ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସମାଜ ସେବି କୃଷ୍ଣ ଚନ୍ଦ୍ର ପ୍ରଧାନ, ଏନଏସି ଅଧ୍ୟକ୍ଷା ଦୀପାଞ୍ଜଳୀ୍ ଭୋରାଶାଗର, ଏନଏସି ବିଜେଡି ସଭାପତି ମଣ୍ଟୁ ପଣ୍ଡା, ବିନୋଦ ନାଏକ ସମ୍ମାନିତ ଅତିଥି ଭାବେ ଯୋଗ ଦେଇ ଉଭୟ ଦଳଙ୍କୁ ଶୁଭେଚ୍ଛା ଜଣାଇଥିଲେ। ବିଜୟୀ ଦଳଙ୍କୁ ମୁଖ୍ୟଅତିଥି ଟ୍ରଫି ଓ ମାନପତ୍ର ପ୍ରଦାନ କରିଥିଲେ। ଏହି ଟୁର୍ଣ୍ଣାମେଣ୍ଟର ମଞ୍ଚ ପରିଚାଳନା ପ୍ରଦୀପ ପ୍ରଧାନ କରିଥିଲେ। ପ୍ରଦୀପ ଦାଶ, ପ୍ରଦୀପ ସାହୁ, ଶିବୁ ଓ ରଞ୍ଜୁ ଛତ୍ରିଆ ଖେଳ ପରିଚାଳନା କରିଥିଲେ। ଏହି ଟୁର୍ଣ୍ଣାମେଣ୍ଟକୁ ଆଖପାଖ ଅଂଚଳର ବହୁ ସଂଖ୍ୟକ ଦର୍ଶକ ଉପଭୋଗ କରିଥିଲେ।
