କଟକ : ମୁଖ୍ୟ ବିଚାରପତି ଡକ୍ଟର ଜଷ୍ଟିସ ଏସ.ମୁରଲୀଧର ଉଚ୍ଚନ୍ୟାୟାଳୟରେ ମାମଲା ଶୁଣାଣିର ସିଧା ପ୍ରସାରଣ ବ୍ୟବସ୍ଥା ସହିିତ ଅନ୍ୟ କେତେକ ଇ-ସେବା ଉଦ୍ଘାଟନ କରିଛନ୍ତି। ଉଚ୍ଚନ୍ୟାୟାଳୟର ନିଜସ୍ବ ମୋବାଇଲ ଆପ୍, ଜିଲା ଜଜ୍ ଅଦାଲତ ଓ ଅନ୍ୟ ସବ୍-ଅର୍ଡିନେଟ୍ ଅଦାଲତରେ ଅନ୍ଲାଇନରେ ଜୋରିମାନା ଜମା ସୁବିଧା, ଭୁବନେଶ୍ବର-କଟକ କମିସନରେଟ ଅଞ୍ଚଳରେ ଟ୍ରାଫିକ୍ ଇ-ଚାଲାଣ ମାମଲାର ଭର୍ଚୁଆଲ ଅଦାଲତରେ ଶୁଣାଣି ବ୍ୟବସ୍ଥାକୁ ଆଭାସି (ଭିଡିଓ କନଫରେନ୍ସିଂ)ବ୍ୟବସ୍ଥାରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟ ବିଚାରପତି ସୋମବାର ଉଦ୍ଘାଟନ କରିଛନ୍ତି। କାର୍ଯ୍ୟକ୍ରମରେ ବିଚାର ବ୍ୟବସ୍ଥାରୁ ଜନସାଧାରଣ ବହୁତ କିଛି ଆଶା କରୁଥିବାବେଳେ ବିଚାରବିଭାଗୀୟ ଅଧିକାରୀ ଓ ଆଇନଜୀବୀମାନେ ଏହି ଆଶାପୂରଣ ପାଇଁ କାର୍ଯ୍ୟ କରିବାକୁ ମୁଖ୍ୟ ବିଚାରପତି ପରାମର୍ଶ ଦେଇଥିଲେ। କୋର୍ଟ କାର୍ଯ୍ୟରେ ସ୍ବଚ୍ଛତା ରକ୍ଷା ପାଇଁ ଏହି ସିଧା ପ୍ରସାରଣ ବ୍ୟବସ୍ଥା ସହାୟକ ହେବ ବୋଲି ମୁଖ୍ୟ ବିଚାରପତି କହିଥିଲେ।
ଉଚ୍ଚନ୍ୟାୟାଳୟ ସୂଚନା ପ୍ରଯୁକ୍ତି ବିଦ୍ୟା ଓ ଆର୍ଟିଫିସିଆଲ ଇଣ୍ଟିଲିଜେନ୍ସ କମିଟି ଅଧ୍ୟକ୍ଷ ଜଷ୍ଟିସ ବିଶ୍ବଜିତ ମହାନ୍ତି ଓ କମ୍ପ୍ୟୁଟର କମ୍ ଷ୍ଟିଅରିଂ କମିଟିର ପୂର୍ବତନ ଅଧ୍ୟକ୍ଷ ଜଷ୍ଟିସ ଶତ୍ରୁଘନ ପୂଜାହାରୀ ଉଚ୍ଚନ୍ୟାୟାଳୟର ନୂତନ ମୋବାଇଲ ଆପ୍, ଅନ୍ଲାଇନରେ ଜୋରିମାନା ଜମା ବ୍ୟବସ୍ଥା ଓ ଭର୍ଚୁଆଲ କୋର୍ଟ ବ୍ୟବସ୍ଥାର ଫାଇଦା ଉପରେ ଆଲୋକପାତ କରିଥିଲେ। ଅନ୍ୟମାନଙ୍କ ମଧ୍ୟରେ ଅାଡ୍ଭୋକେଟ ଜେନେରାଲ ଅଶୋକ କୁମାର ପରିଜା, ପୁଲିସ ଡିଜି, ପୁଲିସ କମିସନର, ପରିବହନ କମିସନର, ଏନଆଇସି ରାଜ୍ୟ ଇନଫରମାଟିକ୍ ଅଫିସର ଓ ଅନ୍ୟମାନେ ଉପସ୍ଥିତ ଥିଲେ। ହାଇକୋର୍ଟ ୱେବସାଇଟରେ ମୋବାଇଲ ଆପ୍, ଜୋରିମାନା ରାଶିର ଇ-ପେମେଣ୍ଟ, ଭର୍ଚୁଆଲ କୋର୍ଟ ସଂପର୍କିତ ନିୟମାବଳୀ ଓ କାର୍ଯ୍ୟବିଧି ଉପଲବ୍ଧ ବୋଲି ସୂଚନା ମିଳିଛି।
