କୋଇଲା, ଇସ୍ପାତ ଏବଂ ଆଲୁମିନିୟମ୍ କ୍ଷେତ୍ରରେ ସଫଳତା ହାସଲ କରିଥିବା ନାଲକୋର ପୂର୍ବତନ ସିଏମଡି ଓ ବର୍ତ୍ତମାନ ବାଲକୋର ସ୍ୱାଧୀନ ନିର୍ଦ୍ଦେଶକ ଡଃ ତପନ କୁମାର ଚାନ୍ଦଙ୍କୁ ବେଦାନ୍ତ ତାର ଓଡିଶା ଏବଂ ଛତିଶଗଡ ପାଇଁ ଆବାସିକ ନିର୍ଦ୍ଦେଶକ (ରେସିଡେଣ୍ଟ୍ ଡାଇରେକ୍ଟର) ନିଯୁକ୍ତ କରିଛି।
ଡଃ ଚାନ୍ଦ ଗତକାଲି ଏହି ଦାୟିତ୍ୱ ଗ୍ରହଣ କରିଛନ୍ତି। ବେଦାନ୍ତର ୩ ମିଲିୟନ୍ ଟନ୍ ଆଲୁମିନିୟମ୍ ଏବଂ ୬ ମିଲିୟନ୍ ଟନ୍ ଆଲୁମିନିଅମ ଉତ୍ପାଦନ ସହ ବିଶ୍ୱର ଦ୍ୱିତୀୟ ବୃହତ୍ତମ ଉତ୍ପାଦକ ଭାବରେ ଉଭା ହେବା ପରେ ଡଃ ଚାନ୍ଦଙ୍କୁ ଏହି ନିଯୁକ୍ତି ମିଳିଛି। ବର୍ତ୍ତମାନ ବେଦାନ୍ତ ହେଉଛି ଭାରତରେ ଆଲୁମିନିୟମର ସବୁଠାରୁ ବଡ ଉତ୍ପାଦକ। ଆଗାମୀ ୫ ବର୍ଷରେ ଆଲୁମିନିୟମର ଚାହିଦା ଦ୍ୱିଗୁଣିତ ହେବାର ସମ୍ଭାବନା ଥିବାରୁ, ବେଦାନ୍ତ ଦେଶର ଆଲୁମିନିୟମ ଚାହିଦା ପୂରଣ କରିବା ଏବଂ ଆତ୍ମ ନିର୍ଭର ଭାରତକୁ ସୁନିଶ୍ଚିତ କରିବା ପାଇଁ ଯୋଜନା କରିଛି।
ଆଗାମୀ ଦିନରେ ବେଦାନ୍ତ ପାଇଥିବା ତିନୋଟି କୋଇଲା ବ୍ଲକର କାର୍ଯ୍ୟକାରିତା ସହ ବାର୍ଷିକ ୧୮ ନିୟୁତ ଟନ୍ ଉତ୍ପାଦନ ବୃଦ୍ଧି ଏବଂ ବାର୍ଷିକ ୨୨ ନିୟୁତ ଟନ୍ ବକ୍ସାଇଟ୍ ସୁରକ୍ଷା ଡଃ ଚାନ୍ଦଙ୍କ ପ୍ରମୁଖ କାର୍ଯ୍ୟ ହେବ। ଏହା ବ୍ୟତୀତ ଝାରସୁଗୁଡା ଓ ଛତିଶଗଡରେ ଆଲୁମିନିଅମ ପାର୍କ ପ୍ରତିଷ୍ଠା ତାଙ୍କ ପାଇଁ ଏଜେଣ୍ଡା ରହିବ। ଯେହେତୁ ଡକ୍ଟର ଚାନ୍ଦ ପୂର୍ବରୁ ଅଭିନବ ଉପାୟରେ କର୍ପୋରେଟ ସାମାଜିକ ଦାୟିତ୍ୱବୋଧ ଯୋଜନା କାର୍ଯ୍ୟକାରୀ କରିବା କ୍ଷେତ୍ରରେ ଅଭୂତପୂର୍ବ ସଫଳତା ହାସଲ କରିଛନ୍ତି ତେଣୁ ଆଗାମୀ ଦିନରେ ଓଡିଶା ଏବଂ ଛତିଶଗଡରେ ସ୍ଥାନୀୟ ଲୋକଙ୍କ ବିକାଶ କ୍ଷେତ୍ରରେ ଡଃ ଚାନ୍ଦ ପ୍ରମୁଖ ଭୂମିକା ଗ୍ରହଣ କରିବେ ବୋଲି ଆଶା କରାଯାଉଛି।
ସୂଚନାଯୋଗ୍ୟ, ଚାନ୍ଦଙ୍କ କାର୍ଯ୍ୟକାଳ ମଧ୍ୟରେ ନାଲକୋ, ପଞ୍ଚପାଟପାଲୀ ବକ୍ସାଇଟ୍ ଖଣିଗୁଡ଼ିକର ଲିଜ୍ ବୃଦ୍ଧି, ପଟାଙ୍ଗି ବକ୍ସାଇଟ୍ ଖଣି ଏବଂ କୋଇଲା ବ୍ଲକ୍ ଆବଣ୍ଟନ କ୍ଷେତ୍ରରେ ସଫଳତା ଅର୍ଜନ କରିଛି। ଡଃ ଚାନ୍ଦଙ୍କ ନିଯୁକ୍ତିକୁ ଶିଳ୍ପ ସଂସ୍ଥା, ବୃତ୍ତିଗତ ଏବଂ ଓଡିଶା ଓ ଛତିଶଗଡର ବ୍ୟବସାୟିକ ଅଂଶୀଦାରମାନେ ସ୍ୱାଗତ କରିଛନ୍ତି।
