ଭୁବନେଶ୍ବର: ଆଜି କୋଭିଡ ନିୟମ ଉଲ୍ଲଙ୍ଘନ ଅଭିଯୋଗରେ ତାରିଣୀ ବସ୍ତ୍ରାଳୟ ଉପରେ ବିଏମ୍ସି ପକ୍ଷରୁ ଚଢ଼ାଉ କରାଯାଇଥିଲା। ପ୍ରବଳ ଗହଳି ପାଇଁ ତାରିଣୀ ବସ୍ତ୍ରାଳୟକୁ ସିଲ କଲା ଭୁବନେଶ୍ବର ମହାନଗର ନିଗମ(ବିଏମ୍ସି)। ଉଭୟ ଦୋକାନୀ ଓ ଗ୍ରାହକଙ୍କଠାରୁ ବିଏମ୍ସି ପକ୍ଷରୁ ମୋଟ ଏକ ଲକ୍ଷ ଟଙ୍କା ଜରିମାନା ଆଦାୟ କରାଯାଇଥିଲା। ସେଥିମଧ୍ୟରୁ ତାରିଣୀ ବସ୍ତ୍ରାଳୟ ଦୋକାନୀଙ୍କଠାରୁ ୭୫ହଜାର ଏବଂ ଗ୍ରାହକଙ୍କଠାରୁ ୨୫ହଜାର ଟଙ୍କା ଜରିମାନା ଆଦାୟ ହୋଇଥିଲା।
କୋଭିଡ ନିୟମ ଉଲ୍ଲଙ୍ଘନ କରି ତାରିଣୀ ବସ୍ତ୍ରାଳୟ ଖୋଲାଯାଇଥିଲା। ଦୋକାନ ଭିତରେ ବହୁ ସଂଖ୍ୟକ ଗ୍ରାହକ ବିଭିନ୍ନ ଲୁଗା, ପୋଷାକ ଓ ଅନ୍ୟାନ୍ୟ ସାମଗ୍ରୀ କିଣିବା ପାଇଁ ଭିଡ଼ ଜମାଇଥିଲେ। ବିଏମ୍ସି ପକ୍ଷରୁ ଏକ ସ୍ବତନ୍ତ୍ର ଟିମ ତାରିଣୀ ବସ୍ତ୍ରାଳୟ ଚଢ଼ାଉ ସମୟରେ କୋଭିଡ ନିୟମ ଉଲ୍ଲଙ୍ଘନ ହୋଇଥିବା ଦେଖିବାକୁ ପାଇଥିଲେ। ତା’ପରେ କୋଭିଡ ନିୟମ ଉଲ୍ଲଙ୍ଘନ ଅଭିଯୋଗରେ ଦୋକାନ ସିଲ କରାଯାଇଥିଲା ଏବଂ ଦୋକାନ ମାଲିକଙ୍କଠାରୁ ୭୫ହଜାର ଜରିମାନା ଆଦାୟ। ପ୍ରତି ଗ୍ରାହକଙ୍କଠାରୁ ମଧ୍ୟ ୫ଶହ ଟଙ୍କା ଲେଖାଏଁ ଜରିମାନା ଆଦାୟ କରାଯାଇଥିଲା। ସେହିପରି ଗ୍ରାହକଙ୍କଠାରୁ ମୋଟ ୨୫ହଜାର ଟଙ୍କା ଜରିମାନା ଆଦାୟ ହୋଇଥିବା ବିଏମସି ଆସିଷ୍ଟାଣ୍ଟ କମିଶନର ଲିଲନ ପ୍ରସାଦ ସାହୁ ଦେଇଛନ୍ତି।
ଲୁଗା, ପୋଷାକ ଓ ଅନ୍ୟାନ୍ୟ ସାମଗ୍ରୀ କିଣିବାକୁ ଆସିଥିବା ଗ୍ରାହକ ଅଭିଯୋଗ କରିଛନ୍ତି ଯେ ସରକାର ବିବାହ ଓ ବ୍ରତ ପାଇଁ ଅନୁମତି ଦେଇଥିବାବେଳେ ପୁରୁଣା ଲୁଗା କିଭଳି ପିନ୍ଧି ଏହା ପାଳନ କରାଯିବ। ଜୁଲାଇ ୨ରେ ବିବାହ ତିଥି ଥିବାରୁ ଲୁଗା କିଣିବାକୁ ଆସିଥିଲୁ। ବିଏମ୍ସି ଜରିମାନା ଆଦାୟ ପରେ ମଧ୍ୟ ଜିନିଷ ନେବାକୁ ଦେଇନାହିଁ। ଅପରପକ୍ଷରେ ବିଏମ୍ସି ଅଧିକାରୀ କହିଛନ୍ତି ଯେ ତାଲା ବନ୍ଦ ସମୟରେ ଅନଲାଇନ ମାଧ୍ୟମରେ ଜିଣିଷ କିଣିବାକୁ ଅନୁମତି ଦିଆଯାଇଛି। ଦୋକାନୀ ଚାହିଁଲେ ଆବଶ୍ୟକତା ଅନୁଯାୟୀ ଲୁଗା ଓ ପୋଷାକ ଲୋକଙ୍କୁ ଯୋଗାଇ ଦେଇପାରିବେ।
