ଭାରତରେ କୋଭିଶିଲ୍ଡ ଟିକାର ୨ଟି ପାନ ମଧ୍ୟରେ ବ୍ୟବଧାନ ୪ ସପ୍ତାହ ବଦଳରେ ୪ ମାସ କରାଯାଇଛି। କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ମୁଖ୍ୟ ଚିକିତ୍ସା ପରାମର୍ଶଦାତା ଡ. ଫାଉଚୀ ଯଥାର୍ଥ ବୋଲି କହିଛନ୍ତି। ଏକ ସାକ୍ଷାତକାରରେ ଡା. ଫାଉଚୀ କହିଛନ୍ତି, ଯଦି ଟିକାର ଅଭାବ ରହିଛି ଏବଂ ଅଧିକରୁ ଅଧିକ ଲୋକଙ୍କୁ ଟିକା ଦେବା ଜରୁରୀ, ତେବେ ଏହି ପଦ୍ଧତି ଆପଣାଇବା ସମ୍ପୂର୍ଣ୍ଣ ଠିକ୍।
ଏହାବ୍ୟତୀତ ଫାଉଚୀ ଆହୁରି କହିଛନ୍ତି ଯେ, ଭାରତକୁ ଟିକାକରଣ ଅଭିଯାନକୁ ତ୍ଵରିତ କରିବା ଲାଗି ଅନ୍ୟ ଦେଶ ଏବଂ କମ୍ପାନୀଗୁଡ଼ିକ ସହିତ ସହଯୋଗ କରିବା ଦରକାର, ଫଳରେ ସମସ୍ତ ନାଗରିକଙ୍କୁ ଖୁବଶୀଘ୍ର ଟିକା ଦିଆଯାଇ ପାରିବ। ଭାରତକୁ ବିଶ୍ଵର ସବୁଠୁ ବଡ଼ ଟିକା ଉତ୍ପାଦନକାରୀ ରାଷ୍ଟ୍ର ବୋଲି ଦର୍ଶାଇ ସେ କହିଛନ୍ତି, ଭାରତ ଏକ ବହୁତ ବଡ଼ ଦେଶ। ସେଥିଲାଗି ଅନ୍ୟ ଦେଶଗୁଡ଼ିକ ସହିତ ମିଶି ଭାରତକୁ କାମ କରିବାକୁ ପଡ଼ିବ। ଯାହାଫଳରେ ଟିକା ଉତ୍ପାଦନ ବୃଦ୍ଧି କରାଯାଇ ପାରିବ।
ଭାରତକୁ କେବଳ ବିଦେଶରୁ ଅମ୍ଳଜାନ, ଅମ୍ଳଜାନ ସିଲିଣ୍ଡର, ବ୍ୟକ୍ତିଗତ ସୁରକ୍ଷା ଉପକରଣ କିଟ୍, ମାସ୍କ, ଅମ୍ଳଜାନ କନସେନ୍ଟ୍ରେଟର ମିଳିବା ଯଥେଷ୍ଟ ନୁହେଁ, ବରଂ ଲୋକଙ୍କୁ କିପରି ଅଧିକରୁ ଅଧିକ ମାତ୍ରାରେ ଟିକା ଦିଆଯାଇପାରିବ ତାହା ଉପରେ ବି ଜୋର୍ ଦେବା ଉଚିତ। ସେ ଆହୁରି କହିଛନ୍ତି ଯେ, କରୋନାର ନୂଆ ମ୍ୟୁଟାଣ୍ଟ ବି୧୬୧୭ ଭାରତ ବ୍ୟତୀତ ୪୪ ଦେଶରେ ଠାବ ହୋଇଛି। ସେଥିରେ ଆମେରିକା ବି ସାମିଲ ଅଛି। ଏହି କରୋନା ସଂକଟ ସମୟରେ ଗରିବ ଦେଶଗୁଡ଼ିକୁ ସହାୟତା ଯୋଗାଇଦେବା ଧନୀ ଦେଶଗୁଡ଼ିକର ଦାୟିତ୍ଵ।
#WATCH When you don’t have enough vaccines, extending duration b/w 1st & 2nd dose to get more people to at least get 1st dose is a reasonable approach. Unlikely that long delay would’ve negative effect on vaccine efficacy: Dr Anthony Fauci, top US infectious disease expert to ANI pic.twitter.com/25cO35jgR2
— ANI (@ANI) May 14, 2021
