ଝାଡ଼ଖଣ୍ଡର ଚକ୍ରଧରପୁର ଅଞ୍ଚଳରେ ମାଓବାଦୀ ହିଂସା ଘଟାଇଛନ୍ତି। ରବିବାର ରାତିରେ ଲ୍ୟାଣ୍ଡମାଇନ ବିସ୍ଫୋରଣ ଘଟାଇ ରେଳ ଟ୍ରାକକୁ ଉଡ଼ାଇ ଦେଇଛନ୍ତି। ଚକ୍ରଧରପୁର ରେଳ ମଣ୍ଡଳର ଲୋଟାପହାଡ଼ ନିକଟ ରେଳ ଲାଇନରେ ରାତି ପ୍ରାୟ ସାଢ଼େ ୨ଟାରେ ଏହି ଘଟଣା ଘଟିଛି। ଆଜାଦ ହିନ୍ଦ ଏକ୍ସପ୍ରେସ ଟ୍ରେନକୁ ଟାର୍ଗେଟ କରି ଏହି ବିସ୍ଫୋରଣ କରାଯାଇଥିବା କୁହାଯାଉଛି। କିନ୍ତୁ ମାଓବାଦୀମାନେ ସେମାନଙ୍କ ଷଡ଼ଯନ୍ତ୍ରରେ ସଫଳ ହୋଇପାରି ନାହାନ୍ତି। କୌଣସି ଟ୍ରେନ ଏହି ଘଟଣାରେ କ୍ଷତିଗ୍ରସ୍ତ ହୋଇନାହାନ୍ତି।
ଘଟଣା ପରେ ଉକ୍ତ ରେଳ ଲାଇନରେ ଟ୍ରେନ୍ ଚଳାଚଳ ବନ୍ଦ ରହିଛି। ହାଓଡ଼ା-ମୁମ୍ବଇ ରେଳପଥରେ ଟ୍ରେନ ଚଳାଚଳ ସମପୂର୍ଣ୍ଣ ଠପ୍ ହୋଇଯାଇଛି। ବିସ୍ଫୋରଣ ଯୋଗୁ ଚକ୍ରଧରପୁର ରେଳ ମଣ୍ଡଳର ବିଭିନ୍ନ ଷ୍ଟେଶନରେ ଯାତ୍ରୀବାହୀ ଟ୍ରେନ ଅଟକି ରହିଛି। ସୂଚନାଯୋଗ୍ୟ, ମାଓବାଦୀ ଦମନ ଲାଗି ସରକାରଙ୍କ ପକ୍ଷରୁ ଚାଲିଥିବା ଅପରେଶନ ‘ପ୍ରହାର’କୁ ମାଓବାଦୀମାନେ କଡ଼ା ବିରୋଧ କରୁଛନ୍ତି। ଏହାର ପ୍ରତିବାଦରେ ମାଓବାଦୀ ସଂଗଠନ ପକ୍ଷରୁ ଆଜି ଭାରତ ବନ୍ଦ ଡାକରା ଦିଆଯାଇଛି। ଏହା ପୂର୍ବରୁ ଗତ ରାତିରେ ମାଓବାଦୀମାନେ ଟ୍ରେନ ଲାଇନରେ ମାଇନ୍ ବିସ୍ଫୋରଣ ଘଟାଇଛନ୍ତି।
ବିସ୍ଫୋରଣ ଖବର ପାଇବା ପରେ ଜିଲା ପୁଲିସ, ଆରପିଏଫ ସହିତ ରେଲୱେ ଅଧିକାରୀମାନେ ପହଞ୍ଚି ଅନୁସନ୍ଧାନ ଚଳାଇଛନ୍ତି। ଯଥାଶୀଘ୍ର ଟ୍ରାକକୁ ମରାମତି କରି ପୁନର୍ବାର ରେଳ ଚଳାଚଳ ସୁଗମ କରାଇବାକୁ ଉଦ୍ୟମ ଚାଲିଛି।
