ଆଠଗଡ: ଆଠଗଡ ଥାନା ଅନ୍ତର୍ଗତ ରାଧାଗୋବିନ୍ଦପୁର ପଞ୍ଚାୟତ ଅଧିନ ଖୁଣ୍ଟାଡାବ ଗ୍ରାମରେ ରବିବାର ଅପରାହ୍ନ ୩ଟା ସମୟରେ ଆକସ୍ମିକ ଅଗ୍ନିକାଣ୍ଡ ଘଟି ୨ଜଣ ଗରିବ ଲୋକଙ୍କର ୨ବଖରା ଘର ସମେତ ଆସବାବ ପତ୍ର ଜଳି ଯାଇଥିବା ଜଣାପଡିଛି। ଖୁଣ୍ଟାଡାବ ଗ୍ରାମର ଶରତ ବେଉରା ଓ ବ୍ରଜକିଶୋର ବେଉରାଙ୍କର ୨ ବଖରା ଚାଳଘର ପୋଡି ଯାଇଥିବା ଜଣାପଡିଛି। ପରିବାର ଲୋକ ଖାଇପିଇ ଘରେ ଶୋଇଥିବା ବେଳେ ସେମାନଙ୍କ ଘର ଧୂଆଁମୟ ହୋଇଯାଇଥିଲା। ସେମାନେ ବାହାରକୁ ଆସି ଦେଖିବାବେଳକୁ ଚାଳଘର ଜଳୁଛି। ଗ୍ରାମବାସୀଙ୍କ ଠାରୁ ସୂଚନା ପାଇ ଆଠଗଡରୁ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ।
ତେବେ ସେତେବେଳକୁ ସେମାନଙ୍କ ପିନ୍ଧାଲୁଗା ବ୍ୟତୀତ ଘରେ ଥିବା ସମସ୍ତ ଆସବାବପତ୍ର ପୋଡି ପାଉଁଶ ହୋଇଯାଇଛି। ବିଦ୍ୟୁତ୍ ସଟ୍ସର୍କିଟରୁ ଏହି ଅଗ୍ନିକାଣ୍ଡ ଘଟିଥିବା ଆଶଙ୍କା କରାଯାଉଛି। ଅତ୍ୟନ୍ତ ଗରିବ ଶ୍ରେଣୀର ଏହି ଦୁଇ ପରିବାରକୁ ସରକାରୀ ସହାୟତା ସହିତ ପ୍ରଧାନମନ୍ତ୍ରୀ ଆବାସ ବା ବିଜୁ ପକ୍କାଘର ଯୋଜନାରେ ଘର ଯୋଗାଇ ଦେବା ପାଇଁ ଗ୍ରାମବାସୀ ନିବେଦନ କରିଛନ୍ତି।
