ଆମେରିକାର ସାମ୍ବାଦିକ ଡାନିଏଲ ପର୍ଲଙ୍କ ହତ୍ୟାକାରୀ ତଥା ଅଲ-କାଏଦା ଆତଙ୍କବାଦୀ ଅହମ୍ମଦ ଓମାର ସଇଦ ଶେଖ ଏବଂ ତା’ର ତିନି ଜଣ ସହଯୋଗୀକୁ ଜେଲରୁ ମୁକ୍ତ କରିବାକୁ ପାକିସ୍ଥାନର ଏକ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ୪ ଜଣ ସାମ୍ବାଦିକ ଡାନିଏଲ ପର୍ଲଙ୍କ ଅପହରଣ ଓ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି।
ଗତକାଲି ଏହି ମାମଲାର ଶୁଣାଣି କରି ସିନ୍ଧ ହାଇକୋର୍ଟର ଦୁଇ ଜଣିଆ ଖଣ୍ଡପୀଠ ସୁରକ୍ଷା ସଂସ୍ଥାଗୁଡିକୁ ଶେଖ ଏବଂ ଅନ୍ୟ ୩ ସହଯୋଗୀଙ୍କୁ କୌଣସି ପ୍ରକାରେ ନ ଅଟକାଇବାକୁ ନିର୍ଦ୍ଦେଶ ଦେଇଛନ୍ତି ଏବଂ ସେ ସମ୍ପର୍କିତ ସିନ୍ଧ ସରକାରଙ୍କ ସମସ୍ତ ବିଜ୍ଞପ୍ତିକୁ ରଦ୍ଦ କରିଛନ୍ତି। ଏହି ୪ ଜଣଙ୍କୁ ଗିରଫ କରିବା ବେଆଇନ ବୋଲି କୋର୍ଟ କହିଛନ୍ତି। ଏହି ଚାରି ଜଣଙ୍କ ପାଇଁ ମାମଲା ଲଢ଼ୁଥିବା ଆଇନଜୀବୀ କହିଛନ୍ତି ଯେ ଶୁକ୍ରବାର ଦେଶରେ ଏକ ସାଧାରଣ ଛୁଟି ଥିବାରୁ ସେମାନଙ୍କୁ ଶନିବାର (ଡିସେମ୍ବଇ ୨୬) ଦିନ ମୁକ୍ତ କରାଯିବ।
The United States will not forget #DanielPearl. We continue to honor his legacy as a courageous journalist and demand justice for his brutal murder. https://t.co/wrN3MdeETP
— Secretary Pompeo (@SecPompeo) April 3, 2020
ତେବେ ଏଭଳି ନିର୍ଦ୍ଦେଶକୁ ନେଇ ଆମେରିକା ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଏହି ମାମଲାରେ ସିନ୍ଧ ହାଇକୋର୍ଟଙ୍କ ନିର୍ଦ୍ଦେଶକୁ ନେଇ ଆମେରିକା ଗଭୀର ଉଦବେଗ ପ୍ରକାଶ ସହ ଘଟଣା ଉପରେ ନଜର ରଖିଥିବା କହିଛି। ଆମେରିକାର ବୈଦେଶିକ ବିଭାଗ କହିଛି ଯେ ଡାନିଏଲ ପାର୍ଲଙ୍କ ହତ୍ୟା ପାଇଁ ଦାୟୀ ଏକାଧିକ ଆତଙ୍କବାଦୀଙ୍କୁ ମୁକ୍ତ କରିବା ପାଇଁ ସିନ୍ଧ ହାଇକୋର୍ଟଙ୍କ ରାୟରେ ଆମେ ଗଭୀର ଚିନ୍ତିତ।
(1/3)We are deeply concerned by the reports of the December 24 ruling of Sindh High Court to release multiple terrorists responsible for the murder of Daniel Pearl. We have been assured that the accused have not been released at this time.
— State_SCA (@State_SCA) December 24, 2020
ଚଳିତ ବର୍ଷ ଏପ୍ରିଲରେ ଦୁଇ ବିଚାରପତିଙ୍କୁ ନେଇ ଗଠିତ ସିନ୍ଧ ହାଇକୋର୍ଟର ଏକ ଖଣ୍ଡପୀଠ ୪୬ ବର୍ଷିୟ ଶେଖର ମୃତ୍ୟୁ ଦଣ୍ଡକୁ ସାତ ବର୍ଷ କାରାଦଣ୍ଡରେ ପରିବର୍ତ୍ତନ କରିଛନ୍ତି। ଦୋଷୀ ସାବ୍ୟସ୍ତ ହେବା ଏବଂ ଜେଲରେ ରହିବାର ପ୍ରାୟ ଦୁଇ ଦଶନ୍ଧି ପରେ ଏହି ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ଶେଖର ତିନିଜଣ ସହାୟକଙ୍କୁ ମଧ୍ୟ କୋର୍ଟ ନିର୍ଦ୍ଦୋଷରେ ଖଲାସ କରିଥିଲେ।ତେବେ ସିନ୍ଧ ସରକାର ସେମାନଙ୍କୁ ମୁକ୍ତ କରିବାକୁ ମନା କରିଦେଇଥିଲେ।
ତେବେ ସେମାନେ ଯେଭଳି ଦେଶ ଛାଡି ନ ଯାଇ ପାରିବେ ସେଥିପାଇଁ ନୋ-ଫ୍ଲାଏ ତାଲିକାରେ ସେମାନଙ୍କ ନାମ ରଖିବାକୁ କୋର୍ଟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଯେତେବେଳେ ବି ସେମାନଙ୍କୁ ଡକାଯିବ ସେମାନେ କୋର୍ଟରେ ହାଜର ହେବାକୁ ମଧ୍ୟ କୋର୍ଟ ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ଆମେରିକାର ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍ ପାଇଁ ଦକ୍ଷିଣ ଏସିଆ ବ୍ୟୁରୋ ମୁଖ୍ୟ ୩୮ ବର୍ଷୀୟ ଡାନିଏଲ ପର୍ଲ ୨୦୦୨ ମସିହାରେ ଆତଙ୍କୀ ସଂଗଠନ ଆଇଏସ୍ଆଇ ଏବଂ ଅଲ-କାଏଦା ମଧ୍ୟରେ ଥିବା ସମ୍ପର୍କ ଉପରେ ତଥ୍ୟ ସଂଗ୍ରହ କରୁଥିବା ବେଳେ ତାଙ୍କୁ ଅପହରଣ ଓ ମୁଣ୍ଡ କାଟି ଦିଆଯାଇଥିଲା।
