ବେଗୁନିଆ : ବେଗୁନିଆ ଥାନା ଅନ୍ତର୍ଗତ ଡିଙ୍ଗର ଗ୍ରାମରେ ବିବାହ କରିଥିବା କେଳୁଚରଣ ମହାରଣା(୩୫) ପାରିବାରିକ କଳହ ଯୋଗୁଁ ଏବେ ଶ୍ୱଶୁର ଘରେ ନ ରହି ଡିଙ୍ଗର ପର୍ଶୁରାମପୁର ମୌଜାର ଡାହାଲଖାଇ ଠାକୁରାଣୀଙ୍କ ପାଖରେ ଥିବା ଏକ ସରକାରୀ ଘରେ ରହୁଛନ୍ତି । ସେ ବିଭିନ୍ନ ବେପାର ବଣିଜ କରି ଜୀବନଯାପନ କରୁଥିବା ବେଳେ ଗତ୫ ମାସ ହେବ ନିୟମିତ ବନ୍ୟଜନ୍ତୁ ଶୀକାର କରିଆସୁଥିଲେ । ଏସଂକ୍ରାନ୍ତରେ ସ୍ଥାନୀୟ କିଛି ବ୍ୟକ୍ତି ବିଶେଷ ତାଙ୍କର ଏହି କାର୍ଯ୍ୟକୁ ବିରୋଧ କରି ଆସୁଥିବାବେଳେ ତାହା ତାଙ୍କ ଉପରେ କିଛି ପ୍ରଭାବ ପକାଉନଥିଲା । ବିଭିନ୍ନ ଗଣମାଧ୍ୟମରେ ଅନେକ ବାର ସମ୍ବାଦ ପ୍ରକାଶ ପାଇଥିଲେ ମଧ୍ୟ ସ୍ଥାନୀୟ ପୁଲିସ କିମ୍ବା ବନବିଭାଗ ତରଫରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା । ପ୍ରଶାସନିକ କାର୍ଯ୍ୟାନୁଷ୍ଠାନ ଅଭାବ ଯୋଗୁଁ ବନ୍ୟଜନ୍ତୁ ଶୀକାର ତାଙ୍କର ନିତିଦିନିଆ କାର୍ଯ୍ୟରେ ପରିଣତ ହୋଇଯାଇଥିଲା । ସମ୍ପୃକ୍ତ ବ୍ୟକ୍ତି ଜଣକ ଦୈନିକ ବିଦ୍ୟୁତ ତାର ବିଛାଇ ବାରହା ,କୁଟୁରା ,ଠେକୁଆ ,ଟେଣ୍ଟେଇ ଚଢେଇ ଏବଂ ଅନ୍ଧାରୁଆ ବଗ ପକ୍ଷୀ ଶୀକାର କରି ସେହି ମାଂସକୁ ଶାଗ ମାଛ ଦରରେ ବିକ୍ରି କରି ଜୀବନ ଯାପନ କରୁଥିଲା । ପ୍ରତି ୨/୪ ଦିନ ଅନ୍ତରରେ ବଡ଼ ବଡ଼ ବାର୍ହା ମାରି ସେହି ମାଂସକୁ କେଜି ପିଛା ୨୦୦ଟଙ୍କାରେ ବିକ୍ରି କରୁଥିଲା । ଗତକାଲି ରାତିରେ ସେ ବିଛାଇଥିବା ବିଦ୍ୟୁତ ତାରରେ ଏକ ୪୫/୫୦କିଗ୍ରା ଓଜନର ବାର୍ହାକୁ ମାରି ଆଜି ସକାଳୁ ସେ ରହୁଥିବା ସ୍ଥାନରେ କାଟି ବିକ୍ରି କରୁଥିଲା । ପ୍ରାୟ ଅଧା ମାଂସ ବିକ୍ରି କରି ସାରିଥିବା ବେଳେ ଡିଙ୍ଗର ଗ୍ରାମବାସୀଙ୍କ ଠାରୁ ଫୋନ ପାଇ ଖୋର୍ଦ୍ଧା ବନ ବିଭାଗ ରେଞ୍ଜରଙ୍କ ନେତୃତ୍ୱରେ ସେ ମାଂସ ବିକ୍ରି କରୁଥିବା ସ୍ଥାନରେ ଚଢ଼ାଉ କରାଯାଇଥିଲା । ସମ୍ପୃକ୍ତ ବ୍ୟକ୍ତିକୁ ଗିରଫ କରିବା ସହିତ ତାଠାରୁ ୩କେଜି ମାଂସ, ଛାଲ ,ବିଦ୍ୟୁତ ତାର ,ଟାଙ୍ଗିଆ ,କଟୁରି ,ଏବଂ ହୁକ ବାଡ଼ି ଆଦି ଜବତ କରାଯାଇଛି।
Popular Categories
Previous article
Next article