ଡ଼ାକ୍ତରଙ୍କୁ ଭଗବାନ ବୋଲି ଅନେକ କହନ୍ତି । କରୋନା କାଳରେ ଡ଼ାକ୍ତରମାନେ ଯେପରି ଲୋକମାନଙ୍କର ସେବା କରୁଛନ୍ତି ସେଥିପାଇଁ ସେମାନଙ୍କୁ ଆହୁରି ମର୍ଯ୍ୟାଦା ମିଳୁଛି । ହେଲେ ମହାରାଷ୍ଟ୍ରର ଜଣେ ଏମିତି ଡ଼ାକ୍ତର ଅଛନ୍ତି ଯିଏ କି ୭୩ ବର୍ଷ ବୟସରେ ସାଇକେଲରେ ଗାଁକୁ ଗାଁ ବୁଲି ଲୋକଙ୍କ ଚିକିତ୍ସା କରିବାକୁ ଭଲ ପାଆନ୍ତି । ସେ ହେଉଛନ୍ତି ରାମଚାନ୍ଦ ଡ଼ୱେକର ।
ରାମଚନ୍ଦ୍ର ଜଣେ ହୋମିଓପ୍ୟାଥି ଡ଼ାକ୍ତର । ମହାରାଷ୍ଟ୍ରର ଚନ୍ଦ୍ରପୁର ଜିଲାରେ ତାଙ୍କର ଘର । ମାତ୍ର ସେ ଘରେ କେବେ ଲୋକଙ୍କୁ ଚିକିତ୍ସା କରନ୍ତି ନାହିଁ । ଲୋକଙ୍କ ଘରେ ଚିକିତ୍ସା କରିବାକୁ ପହଞ୍ଚ ଯାଆନ୍ତି । ଦିନକୁ ପ୍ରାୟ ୨୦ କିଲୋମିଟର ସାଇକେଲ ଚଳାଇ ଲୋକଙ୍କ ଘରକୁ ଯାଆନ୍ତି । ଗତ ୬୦ ବର୍ଷ ଧରି ସେ ଚିକିତ୍ସା କରୁଛନ୍ତି । ଖରା ହେଉ ବା ବର୍ଷା ଲୋକଙ୍କ ଦ୍ବାରରେ ସେ ପହଞ୍ଚି ଯାଆନ୍ତି । ସାଥୀରେ ଗୋଟିଏ ବ୍ୟାଗ, ଯେଉଁଥିରେ ଔଷଧ ଓ ଆନୁଷଙ୍ଗିକ ସାମଗ୍ରୀ ଥାଏ ।
ରାମଚନ୍ଦ୍ର କହିଛନ୍ତି ଯେ ଆଜିକାଲି କିଛି ଯୁବ ଡ଼ାକ୍ତର କରୋନା କାଳରେ ଚିକିତ୍ସା କରିବାକୁ ଭୟ କରୁଛନ୍ତି । ଟଙ୍କା ପଛରେ ଦୌଡ଼ୁଛନ୍ତି । ମାତ୍ର ମୋର ସେପରି ଭୟ ନାହିଁ । ଡାକ୍ତରମାନଙ୍କର ସବୁଠାରୁ ବଡ ଧର୍ମ ହେଉଛି ରୋଗୀମାନଙ୍କର ସେବା କରିବା। ଆଜି ଆମ ଦେଶରେ ଚିକିତ୍ସା କ୍ଷେତ୍ରରେ ଢ଼େର ଅଗ୍ରଗତି କରିଥିଲେ ହେଁ ଚିକିତ୍ସା ଅଭାବରୁ ବହୁ ରୋଗୀ ପ୍ରାଣ ହରାଉଛନ୍ତି । ତେଣୁ ଯୁବଡ଼ାକ୍ତରମାନେ ଗାଁ ମୁହାଁ ହେବା ଆବଶ୍ୟକ ବୋଲି ରାମଚନ୍ଦ୍ର ମତ ଦେଇଛନ୍ତି । ଗରିବଙ୍କ ଆଶୀର୍ବାଦଠାରୁ ବଡ଼ କିଛି ଫି’ ନାହିଁ ବୋଲି ରାମଚନ୍ଦ୍ର କହିଛନ୍ତି ।
