ଓଡ଼ିଶା ବିଜ୍ଞାନ ଏକାଡେମୀ ଦ୍ୱାରା ୨୦୧୮ ମସିହା ପାଇଁ ବୈଜ୍ଞାନିକ ସମ୍ବର୍ଦ୍ଧନା ଓ ପୁରସ୍କାର ପ୍ରଦାନ ଉତ୍ସବ ଅନୁଷ୍ଠିତ ହୋଇଯାଇଛି। ଆଜି ଭୁବନେଶ୍ୱରସ୍ଥିତ ଓର୍ସାକ୍ କମ୍ଲେକ୍ସର ଏଡ଼ୁସାଟ୍ ଷ୍ଟୁଡ଼ିଓରେ ଏକାଡେମୀର ସଭାପତି ପ୍ରଫେସର ପ୍ରମୋଦ ଚନ୍ଦ୍ର ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ଉତ୍ସବରେ ବିଜ୍ଞାନ ଓ ବୈଷୟିକ ବିଭାଗ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ମୁଖ୍ୟ ଅତିଥି ରୂପେ ଯୋଗଦେଇ ଭିଡ଼ିଓ କନ୍ଫରେନ୍ସିଂ ମାଧ୍ୟମରେ ବୈଜ୍ଞାନିକମାନଙ୍କୁ ସମ୍ବର୍ଦ୍ଧିତ ଓ ପୁରସ୍କୃତ କରିଛନ୍ତି। ଏହି ଅବସରରେ ପ୍ରଫେସର ଶଙ୍କର ପ୍ରସାଦ ପତି ଏବଂ ପ୍ରଫେସର ସୁଦର୍ଶନ ନନ୍ଦଙ୍କୁ ମାନପତ୍ର ଏବଂ ଉତ୍ତରୀୟ ଦେଇ ‘ବରିଷ୍ଠ ବୈଜ୍ଞାନିକ’ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା।
ସେହିପରି ବିଶିଷ୍ଟ ବୈଜ୍ଞାନିକ ପ୍ରଫେସର (ଡାକ୍ତର) ସୁବ୍ରତ କୁମାର ଆଚାର୍ଯ୍ୟଙ୍କୁ ବୈଜ୍ଞାନିକ ଉତ୍କର୍ଷ ପାଇଁ ‘ବିଜୁ ପଟ୍ଟନାୟକ ପୁରସ୍କାର’, ଡାକ୍ତର ସଙ୍ଘମିତ୍ରା ପତି, ପ୍ରଫେସର (ଡ.) ପ୍ରମିଳା କୁମାରୀ ମିଶ୍ର, ପ୍ରଫେସର (ଡ.) ସଞ୍ଜୟ କୁମାର ଦାଶ ଏବଂ ଡକ୍ଟର ସ୍ୱରୂପ କୁମାର ପରିଡ଼ାଙ୍କୁ ‘ସାମାନ୍ତ ଚନ୍ଦ୍ର ଶେଖର ପୁରସ୍କାର’, ଡକ୍ଟର ସନ୍ଦିପ କୁମାର ପଣ୍ଡା, ଡକ୍ଟର ସୁଧନ୍ୱା ପାତ୍ର, ଡକ୍ଟର ଶଙ୍କର୍ଷଣ ମହାପାତ୍ର ଏବଂ ଡକ୍ଟର କୌଶିକ ପରିଡ଼ାଙ୍କୁ ‘ଓଡ଼ିଶା ଯୁବ ବୈଜ୍ଞାନିକ ପୁରସ୍କାର’ ଏବଂ ଡକ୍ଟର ରାଜବଲ୍ଲଭ ମହାନ୍ତି ଏବଂ ଡକ୍ଟର ନରେନ୍ଦ୍ର ପ୍ରସାଦ ଦାସଙ୍କୁ ‘ପ୍ରାଣକୃଷ୍ଣ ପରିଜା ଲୋକପ୍ରିୟ ବିଜ୍ଞାନ ପୁସ୍ତକ ପୁରସ୍କାର’ ପ୍ରଦାନ କରାଯାଇଛି।
ପୁରସ୍କାର ସ୍ୱରୂପ ଅର୍ଥ ରାଶି, ପଦକ, ମାନପତ୍ର, ପ୍ରମାଣପତ୍ର ଓ ଉତ୍ତରୀୟ ପ୍ରଦାନ କରାଯାଇଥିଲା। ଏହି ଉତ୍ସବରେ ବିଜ୍ଞାନ ଓ ବୈଷୟିକ ବିଭାଗର ପ୍ରମୁଖ ଶାସନ ସଚିବ ସନ୍ତୋଷ କୁମାର ଷଡ଼ଙ୍ଗୀ ସମ୍ମାନନୀୟ ଅତିଥିରୂପେ ଯୋଗ ଦେଇଥିଲେ।ଏକାଡ଼େମୀର ସମ୍ପାଦକ ଇଂ. ଭଗତ ଚରଣ ମହାନ୍ତି ଧନ୍ୟବାଦ ଅର୍ପଣ କରିଥିଲେ।
