ଫୁଲବାଣୀ/ଖଜୁରିପଡ଼ା: ଶେଷରେ ସମାଜର ପ୍ରୟାସ ସଫଳ ହୋଇଛି। ୨୧ ଥର ଆଧାରକାର୍ଡ଼ ଫଟୋ ଉଠାଇ ସବୁବେଳେ ବିଫଳ ହୋଇଥିବା ହିତାଧିକାରୀ ଜିତେନ୍ଦ୍ର କୁମାର ସେଠୀ ଶେଷରେ ନିଜ ଆଧାରକାର୍ଡ଼ ପାଇବାରେ ସଫଳ ହୋଇଛନ୍ତି। ଆଜି ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଜିତେନ୍ଦ୍ରଙ୍କୁ ବ୍ଳକ ପ୍ରଶାସନ ପକ୍ଷରୁ ଆଧାରକାର୍ଡ଼ ନକଲ ପ୍ରଦାନ କରାଯାଇଛି। ତେବେ ଦୀର୍ଘବର୍ଷ ଧରି ଜିତେନ୍ଦ୍ର ଏଥିପାଇଁ ଚେଷ୍ଟା କରିଥିଲେ କିନ୍ତୁ ବାରମ୍ବାର ବିଫଳ ହୋଇଥିଲେ। ଏନେଇ ‘ସମାଜ’ରେ ଲଗାତାର ଭାବେ ଖବର ପ୍ରକାଶ ପାଇଥିଲା। ଏହାକୁ ଖଜୁରିପଡ଼ା ଗୋଷ୍ଠି ଉନ୍ନୟନ ଅଧିକାରୀ ରବିନ୍ଦ୍ର ନାଥ କହଁର ଗୁରୁତ୍ୱର ସହିତ ଗ୍ରହଣ କରିଥିବାରୁ ଏହା ସଫଳ ହୋଇଛି।
ଆଜି ଅନୁଷ୍ଠିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ବିଡ଼ିଓ ଶ୍ରୀ କହଁରଙ୍କ ସମେତ, ଏବିଡ଼ିଓ ଦିବ୍ୟ ସିଂହ କହଁର, କମ୍ପ୍ୟୁଟର ଲାବ୍ର ଜିଲା କର୍ମଚାରୀ କୃପାସିନ୍ଧୁ ସାମଲ ଓ ଆଧାର କାର୍ଡ଼ ଅପରେଟର ବଚଦ ଦିଗାଲ ପ୍ରମୁଖଙ୍କ ଉପସ୍ଥିତିରେ ଜିତେନ୍ଦ୍ରଙ୍କୁ ପ୍ରଦାନ କରାଯାଇଛି ଆଧାରକାର୍ଡ଼। ଆଧାରକାର୍ଡ଼ ପାଇବା ପରେ ଜିତେନ୍ଦ୍ରଙ୍କ ମନରେ ଯେଉଁ ଅସରନ୍ତି ଖୁସି ସୃଷ୍ଟି ହୋଇଥିଲା ତାହା ନ ଦେଖିବା ଲୋକ ବିଶ୍ୱାସ କରିପାରିବ ନାହିଁ। ସେ ନିଜର ହକ୍ ପାଇ ପାରିଥିବା ଯୋଗୁଁ ବ୍ଳକ ପ୍ରଶାସନ ଓ ସମାଜ ଖବର କାଗଜକୁ ସାଧୁବାଦ ଦେବା ସହିତ ବର୍ତ୍ତମାନ ସେ ସରକାରଙ୍କ ଅନ୍ୟ ଯୋଜନାରେ ନିଜକୁ ସାମିଲ୍ କରିବାରେ ଏହି ଆଧାରକାର୍ଡ଼ ସହାୟକ ହେବ ବୋଲି ପ୍ରକାଶ କରିଥିଲେ।
ପ୍ରକାଶ ଯେ, ୨୧ଥର ଆଧାରକାର୍ଡ଼ ଉଠାଇଥିଲେ ମଧ୍ୟ ତାହା ସଫଳ ହୋଇନଥିବା ଯୋଗୁଁ ଜିତେନ୍ଦ୍ର ସମସ୍ତ ଯୋଜନାରୁ ବଂଚିତ ହୋଇଥିବା ନେଇ ଖବର ପ୍ରକାଶ ପରେ ଗତ ଦିନରେ ବ୍ଳକ ପ୍ରଶାସନ ପକ୍ଷରୁ ଜିତେନ୍ଦ୍ରକୁ ରାସନକାର୍ଡ଼ରେ ସାମିଲ୍ କରାଯାଇ ୨ ମାସର ଚାଉଳ ମଧ୍ୟ ପ୍ରଦାନ କରାଯାଇଥିଲା। ପୂର୍ବରୁ ପରିବାରର ଅନ୍ୟ ସମସ୍ତଙ୍କ ନାମରେ ଚାଉଳ ମିଳୁଥିଲେ ମଧ୍ୟ ଜିତେନ୍ଦ୍ରଙ୍କ ନାମରେ ଚାଉଳ ମିଳୁନଥିଲା। ପରବର୍ତ୍ତି ସମୟରେ ଗତ ୫ ତାରିଖରେ ବ୍ଳକ ପ୍ରଶାସନ ଉପସ୍ଥିତିରେ ୨୨ତମ ଆଧାରକାର୍ଡ଼ ଫଟୋ ଉଠାଯାଇଥିଲା। ଖଜୁରିପଡ଼ା ବିଡ଼ିଓଙ୍କ ପ୍ରତ୍ୟେକ୍ଷ ତତ୍ୱାବଧାନରେ ଆଧାର ପାଇଁ ଫଟୋ ଉତ୍ତୋଳନ ହୋଇଥିବା ବେଳେ ଏଥିରେ ହାଇଦ୍ରାବାଦରୁ ୟୁଆଇଡ଼ିଏଆଇର ଆସିଷ୍ଟାଣ୍ଟ ମ୍ୟାନେଜର ଭେଙ୍କଟେସ୍ ଛେନୁପାଲ୍ ନିଜେ ଅନ୍ ଲାଇନ୍ରେ ରହି ଫଟୋ ଉତ୍ତୋଳନ ଠିକ୍ ଭାବେ ହେଉଛି କି ନାହିଁ ତାହାର ତଦାରଖ କରିଥିଲେ।
Comments are closed.