ହରଭଙ୍ଗା : ଲଗାଣବର୍ଷା ସାଙ୍ଗକୁ ହୀରାକୁଦର ବନ୍ୟାଜଳ ନିଷ୍କାସନରେ ତଳମୁଣ୍ଡରେ ବନ୍ୟା ପରିସ୍ଥିତି ସୃଷ୍ଟି ହୋଇଛି।ମହାନଦୀ ବନ୍ୟାରେ ହରଭଙ୍ଗା ତହସିଲର ୫୫ରୁ ଅଧିକ ନଦୀକୂଳିଆ ଗାଁ ଦୀର୍ଘ ୭ଦିନହେଲା ଜଳମଗ୍ନ ହୋଇରହିଛି। ଏହା ସହିତ ୩୦ରୁ ଅଧିକ ଗାଁକୁ ଯୋଗାଯୋଗ ବିଛିନ୍ନ ରହିଛି। ମାରଡା,କୋଡାଶିଙ୍ଗା ,ଖଣ୍ଡିଧଳପୁର,ଏବଂ ପାଣିଘରା ଲୋକେ ଦୀର୍ଘ ୫ଦିନହେଲା ପାଣିଘେରରେ ରହିଛି। ଯଦିଓ ଘରଦ୍ୱାରରେ ବନ୍ୟାପାଣି ପଶିବା ଭଳି ପରିସ୍ଥିତ ଉପୁଜିନାହିଁ। ମାତ୍ର ବନ୍ୟା ପାଣିରେ ଶହ ଶହ ହେକ୍ଟର ଧାନ ଚାଷ ପଚିସଢି ନଷ୍ଟ ହେବାକୁ ବସିଛି।
ବନ୍ୟା ବିଭିଷୀକାରେ ଧାନ ଚାଷ ସଂପୂର୍ଣ୍ଣ ଉଜୁଡିଯିବା ସହିତ ଚାଷୀମୁଣ୍ଡରେ ବନ୍ୟାଚଡକ ପଡିଛି।ଏହା ସହିତ ଶହ ଶହ ଏକର ଚାରଣ ଜମିରେ ବନ୍ୟାପାଣି ଜମିରହିବାରୁ ଗାଈ,ଗୋରୁଛେଳି,ମେଣ୍ଢା ପଶୁଜନ୍ତୁ ମଧ୍ୟ ଖାଦ୍ୟଭାବରୁ ଭୋକଉପାସରେ ରହିଥିବା ଜଣାପଡିଛି।ଏଭଳି ସ୍ଥିତିରେ ପ୍ରଶାସନ ପକ୍ଷରୁ ଜଳବନ୍ଦୀ ଗାଁ ଗୁଡିକୁ ରନ୍ଧା ଖାଦ୍ୟ ପ୍ରଦାନ କରାଯାଇଛି।ମାତ୍ର ସାତ ଦିନ ପାଣିଘେରରେ ରହିଥିବା ହରଭଙ୍ଗା,ଡିଆଁଘାଟ,ଭେଜିଗୁଡା,ସୁରୁଣ୍ଡି ଭଳି ଅନେକ ଗ୍ରାମରେ ରିଲିଫ ପ୍ରଦାନରେ ବିଳମ୍ବ ଯୋଗୁଁ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।ତୁରନ୍ତ ଜିଲ୍ଲାପ୍ରଶାସନ ଏଥିପ୍ରତି ଦୃଷ୍ଟି ଦେବା ସହ ଗାଈ,ଗୋରୁଙ୍କ ପାଇଁ ଦାନା ଯୋଗାଇବାକୁ ସାଧାରଣରେ ଦାବୀ ଉଠୁଛି ।
