ନୂଆଦିଲ୍ଲୀ: ଆସନ୍ତା ୧୫ ତାରିଖରେ ସ୍ବାଧୀନତା ଦିବସ ଲାଗି ଦିଲ୍ଲୀର ଲାଲକିଲାରେ ତ୍ରିରଙ୍ଗା ଉତ୍ତୋଳନ କରାଯିବ। ତେବେ ଏହି ସମୟରେ ଲାଲକିଲାରେ ଖଲିସ୍ତାନ ପତାକା ଉଡ଼ାଇବାକୁ ଷଡ଼ଯନ୍ତ୍ର ହୋଇଛି। ଏ ନେଇ ଗୁଇନ୍ଦା ସୂଚନା ମିଳିବା ପରେ ଲାଲକିଲାରେ ସୁରକ୍ଷା ବ୍ୟବସ୍ଥାକୁ ବୃଦ୍ଧି କରାଯାଇଥିବା ଜଣାପଡ଼ିଛି। ଅଗଷ୍ଟ ୧୪, ୧୫ ଏବଂ ୧୬ ତାରିଖରେ ଯେଉଁ ସିଖ୍ ବ୍ୟକ୍ତି ଲାଲ୍କିଲାରେ ଖଲିସ୍ତାନ ପତାକା ଉଡ଼ାଇବେ ତାଙ୍କୁ ୧ ଲକ୍ଷ ୨୫ ହଜାର ଡଲାର ଦେବାକୁ ଆମେରିକାରେ ରହୁଥିବା ଖଲିସ୍ତାନୀ ଆତଙ୍କବାଦୀ ସଂଗଠନ ସିଖ୍ ଫର୍ ଜଷ୍ଟିସର ଗୁରୁପତୱନ୍ତ ସିଂହ ପନ୍ନୁ ଘୋଷଣା କରିଛି।
ଖଲିସ୍ତାନୀ ଆତଙ୍କବାଦୀ ସଂଗଠନ ସିଖ୍ ଫର ଜଷ୍ଟିସର ଆତଙ୍କବାଦୀ ଗୁରୁପତୱନ୍ତ ସିଂହ ପନ୍ନୁ ଏକ ଭିଡିଓ ଜାରି କରି ଏହି ଘୋଷଣା କରିଛନ୍ତି। ନିକଟରେ ଭାରତ ସରକାର ଗୁରୁପତୱନ୍ତ ସିଂହ ପନ୍ନୁକୁ ଆତଙ୍କବାଦୀ ଘୋଷଣା କରିଥିଲେ। ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ସହିତ ମିଶି ଗୁରୁପତୱନ୍ତ ଭାରତ ବିରୋଧରେ ଷଡ଼ଯନ୍ତ୍ର ଚଳାଇଛି।
ଏହି ଭିଡିଓ ମିଳିବା ପରେ ସୁରକ୍ଷା ସଂସ୍ଥାଗୁଡ଼ିକ ସତର୍କ ହୋଇଯାଇଛନ୍ତି। ଗୁରୁପତୱନ୍ତ ଆଇଏସଆଇ ସହିତ ମିଶି ଭାରତରେ ରେଫରେଣ୍ଡମ ୨୦୨୦ ପାଇଁ ଷଡ଼ଯନ୍ତ୍ର ରଚୁଛି। ଏଥିଲାଗି ପନ୍ନୁଠାରୁ ଦିଲ୍ଲୀ, ପଞ୍ଜାବ, ହରିୟାଣାର ଲୋକଙ୍କୁ ସ୍ବୟଂଚାଳିତ ଫୋନ୍ କଲ୍ ଆସୁଛି। ଏନଆଇଏ ଏହାର ତଦନ୍ତ କରୁଛି।
