ନୂଆଦିଲ୍ଲୀ : ଭାରତରେ ଜଟିଳ ହେବାରେ ଲାଗିଛି ମହାମାରୀ କରୋନାର ସ୍ଥିତି । ଦେଶରେ ହୁ ହୁ ହୋଇ ବଢିବାରେ ଲାଗିଛି କରୋନା ଆକ୍ରାନ୍ତଙ୍କ ସଂଖ୍ୟା । ବିଶ୍ଵର କରୋନା ତାଲିକାରେ ଭାରତ ସପ୍ତମ ସ୍ଥାନରେ ରହିଛି । ଭାରତରେ ବର୍ତ୍ତମାନ ପରିସ୍ଥିତିରେ ଯେପରି ଭାବେ ପ୍ରତିଦିନ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି ସେଥିରୁ ଜଣାପଡୁଛି ଖୁବ୍ ଶିଘ୍ର ଭାରତ ବିଶ୍ଵ କରୋନା ସଂକ୍ରମିତ ଦେଶ ତାଲିକାରେ ଏକ ନମ୍ବରରେ ଥିବା ଆମେରିକାରକୁ ବି ପଛରେ ପକାଇଦେବ । କାରଣ ବିଶ୍ଵ କରୋନା ତାଲିକାରେ ୧୦ ନମ୍ବରରେ ଥିବା ଭାରତକୁ ସପ୍ତମ ସ୍ଥାନକୁ ଯିବା ପାଇଁ ମାତ୍ର ଏକ ସପ୍ତାହ ଲାଗିଥିଲା ।
ଭାରତରେ କରୋନା ଆକ୍ରାନ୍ତଙ୍କ ସଂଖ୍ୟା ଉଦବେଗଜନକ ଭାବେ ବଢ଼ିବାରେ ଲାଗିଛି । ଗତ ୨୪ ଘଣ୍ଟାରେ ଦେଶରେ ସର୍ବାଧିକ ୮୧୭୧ ଟି ନୂଆ କରୋନା ଆକ୍ରାନ୍ତଙ୍କ ମାମଲା ସାମନାକୁ ଆସିଛି। ଏହାସହ ୨୦୪ ଜଣ ପ୍ରାଣ ହରାଇଥିବା ଜଣାପଡ଼ିଛି । ଏନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ୱେବସାଇଟରେ ସୂଚନା ଦିଆଯାଇଛି ।
ସୂଚନାଯୋଗ୍ୟ ବର୍ତ୍ତମାନ ସୁଦ୍ଧା ଦେଶରେ ୧ଲକ୍ଷ ୯୮ ହଜାର ୭୦୬ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ ୫ ହଜାର ୫୯୮ ଜଣଙ୍କର ମୃତ୍ୟୁ ହୋଇଥିବା ବେଳେ ୯୫ ହଜାର ୫୨୭ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ସେହିପରି ବର୍ତ୍ତମାନ ଦେଶରେ ୯୭ ହଜାର ୫୮୧ ଜଣ ସଂକ୍ରମିତ ବିଭିନ୍ନ କୋଭିଡ ହସ୍ପିଟାଲରେ ଚିକିତ୍ସିତ ହେଉଛନ୍ତି ।
