ନୂଆଦିଲ୍ଲୀ : ଚଳିତ ମାସ ୨୧ ତାରିଖରେ ମହାରାଷ୍ଟ୍ର ବିଧାନ ପରିଷଦ ନଅ ଆସନ ପାଇଁ ନିର୍ବାଚନ ଅନୁଷ୍ଠିତ ହେବ । ନିର୍ବାଚନ କମିଶନ ଏଥିପାଇଁ କାର୍ଯ୍ୟସୂଚୀ ଘୋଷଣା କରିଛନ୍ତି । ସୋମବାର ମତଦାନ ପାଇଁ ବିଜ୍ଞପ୍ତି ଜାରି କରାଯିବ ଏବଂ ମେ’ ୧୧ ପର୍ଯ୍ୟନ୍ତ ନାମାଙ୍କନପତ୍ର ଦାଖଲ କରାଯାଇ ପାରିବ । ମତଦାନ ଦିନ ହିଁ ଭୋଟ ଗଣନା କରାଯିବ।
ଏହାପୂର୍ବରୁ କରୋନା ଭାଇରସ ସଂକ୍ରମଣ ଯୋଗୁଁ ମତଦାନ ସ୍ଥଗିତ ରଖାଯାଇଥିଲା । ମହାରାଷ୍ଟ୍ର ରାଜ୍ୟପାଳ ଭାଗବତ ସିଂ କୋଶିୟାରୀ ଗୁରୁବାର ଦିନ ନିର୍ବାଚନ ଆୟୋଗଙ୍କୁ ରାଜ୍ୟ ବିଧାନ ପରିଷଦରେ ଖାଲିଥିବା ନଅଟି ଆସନ ପାଇଁ ମତଦାନ ସଂପର୍କରେ ଘୋଷଣା କରିବାକୁ ଅନୁରୋଧ କରିଥିଲେ ।ସୂଚନା ଯୋଗ୍ୟ, ଗତ ବର୍ଷ ନଭେମ୍ବର ୨୮ରେ ଶପଥ ଗ୍ରହଣ କରିଥିବା ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ମେ’ ୨୭ ସୁଦ୍ଧା ରାଜ୍ୟ ବିଧାନସଭାକୁ ନିର୍ବାଚିତ ହେବାକୁ ପଡିବ । କାରଣ ସେ ସେ ବିଧାନସଭା କିମ୍ବା ବିଧାନ ପରିଷଦର ସଦସ୍ୟ ନାହାନ୍ତି ।
