ନୂଆଦିଲ୍ଲୀ: କରୋନାଜନିତ ଲକ୍ଡ଼ାଉନ ଯୋଗୁଁ ଦେଶର ଅର୍ଥନୀତି ସ୍ଥିତି ଗୁରୁତର । ଆର୍ଥିକ ସ୍ଥିତିକୁ ଦେଖି କେନ୍ଦ୍ର ସରକାର ବିଭିନ୍ନ ବ୍ୟୟ ସଙ୍କୋଚନ ନୀତି ଗ୍ରହଣ କରୁଛନ୍ତି । ବିଭିନ୍ନ ରାଜ୍ୟରେ ମଧ୍ୟ ସ୍ଥିିତି ସମାନ । କର୍ଣ୍ଣାଟକ ସରକାର କର୍ମଚାରୀଙ୍କୁ ଦରମା ଦେବାକୁ ଟଙ୍କା ନାହିଁ ବୋଲି ଖୋଲାଖୋଲି କହିବାକୁ ପଛାଇ ନାହାନ୍ତି । ତେଲେଙ୍ଗାନା, ଆନ୍ଧ୍ର, ଛତିଶଗଡ଼, କେରଳ, ତାମିଲନାଡ଼ୁ ଆଦି ସରକାରଙ୍କ ମଧ୍ୟ ଅନୁରୂପ ମତ । ଏପରି ସ୍ଥିତିରେ ମଦ ଦୋକାନ ଖୋଲାଯିବା ନିମନ୍ତେ କେନ୍ଦ୍ର ଉପରେ ପଡ଼ିଛି ଚାପ । ବିଭିନ୍ନ ରାଜ୍ୟ ସରକାର ବୁଲେଇ ବଙ୍କେଇ ଏପରି ପ୍ରସ୍ତାବ ଦେଇଛନ୍ତି । ଆସାମ ଓ କେରଳରେ ଓଳିକିଆ ମଦ ଦୋକାନ ଖୋଲିବାକୁ ନିଷ୍ପତ୍ତି ନିଆଯାଇଥିଲେ ହେଁ ତାହାକୁ ପରବର୍ତୀ ସମୟରେ ପ୍ରତ୍ୟାହାର କରି ନିଆଯାଇଛି । ପଞ୍ଜାବ ସରକାର ମଦ ବିକ୍ରି ଅନୁମତି ଦେବାକୁ କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି ।
କେନ୍ଦ୍ର ସରକାରଙ୍କ ଜଣେ ବରିଷ୍ଠ ଅଧିକାରୀଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ ଲକ୍ଡ଼ାଉନରେ ମଦ ଦୋକାନ ବନ୍ଦ କରାଯିବା ପରେ ଅବକାରୀ ରାଜସ୍ବ ଆଦାୟ ଶୂନକୁ ଖସି ଆସିଛି । ଉତ୍ପାଦନ ଟିକସଠାରୁ ଆରମ୍ଭ କରି ବିକ୍ରି ପର୍ଯ୍ୟନ୍ତ ଗୋଟିଏ ଦିନରେ ବିଭିନ୍ନ ରାଜ୍ୟ ସରକାରଙ୍କୁ ପ୍ରାୟ ୮୦୦ କୋଟି ଟଙ୍କା ହରାଇବାକୁ ପଡ଼ୁଛି । ଏହି ପରିପ୍ରେକ୍ଷୀରେ ବିଭିନ୍ନ ରାଜ୍ୟ ସରକାର ପ୍ରତ୍ୟକ୍ଷ ଓ ପରୋକ୍ଷ ଭାବରେ ଏହି ପ୍ରସଙ୍ଗ ଉଠାଇ ଲକ୍ଡ଼ାଉନରୁ ମଦକୁ ବାଦ ଦିଆଯିବାକୁ ଅନୁରୋଧ କରିଛନ୍ତି । ତେଣୁ ଆସନ୍ତା ୩ ତାରିଖ ପରେ ତୃତୀୟ ପର୍ଯ୍ୟାୟ ଲକ୍ ଡ଼ାଉନ ଘୋଷଣା ହେଉ କି ନ ହେଉ ମଦ ଦୋକାନ ଖୋଲିବାର ଯଥେଷ୍ଟ ସମ୍ଭାବନା ଅଛି ବୋଲି ସୂଚନା ମିଳିଛି । ତେବେ ବାର୍ ଓ କ୍ଲବରେ ମଦ ବିକ୍ରି ଉପରେ କଟକଣା ରହିବାର ସମ୍ଭାବନା ରହିଛି ବୋଲି ଏହି ସୂତ୍ରରୁ ଜଣାପଡ଼ିଛି ।
ମାର୍ଚ୍ଚ ୨୫ ରୁ ଏପ୍ରିଲ ୧୪ ପ୍ରଥମ ପର୍ଯ୍ୟାୟ ଲକ୍ଡାଉନ୍ ସମୟରେ ଆସାମ ଓ ମେଘାଳୟ ରାଜ୍ୟରେ ମଦ ବିକ୍ରିକୁ ଅନୁମତି ଦେଇଥିଲେ। ହେଲେ କେନ୍ଦ୍ର ସରକାର ମଦ ଉତ୍ପାଦନ ଓ ବିକ୍ରି ନକରିବାକୁ ନିର୍ଦ୍ଦେଶ ଦେବା ପରେ ଦୁଇ ରାଜ୍ୟକୁ ନିଜର ଅନୁମତି ପ୍ରତ୍ୟାହାର କରିବାକୁ ପଡିଥିଲା। ଅନ୍ୟପକ୍ଷରେ ମଦ ଦୋକାନ ବନ୍ଦ ରହିବାରୁ ଚୋରା ମଦ କାରବାର ବୃଦ୍ଧି ପାଇଥିବା କିଛି ରାଜ୍ୟ କେନ୍ଦ୍ରକୁ ଜଣାଇଛନ୍ତି । ଏହାଫଳରେ ମଦମୃତ୍ୟୁ ଆଶଙ୍କା ରହିଥିବାରୁ ମଦ ଦୋକାନ ଖୋଲିବାର ଆବଶ୍ୟକତା ଥିବା କିଛି ରାଜ୍ୟ ଯୁକ୍ତି ବାଢ଼ିଛନ୍ତି ।
