କରୋନା ମୁକାବିଲା ପାଇଁ ସାମୂହିକ ପ୍ରାର୍ଥନା; ଭାଲୁକାଶୁଣି ଚର୍ଚ୍ଚରୁ ଧର୍ମଯାଜକଙ୍କ ସମେତ ୩ଗିରଫ

ନୀଳଗିରି: ଦିଲ୍ଲୀ ନିଜାମୁଦ୍ଦିନରେ ସାମୂହିକ ପ୍ରାର୍ଥନା ସ୍ଥଳର ଭୟାବହ ପରିସ୍ଥିତି ସମ୍ପ୍ରତି ଲୋକଙ୍କ ମନରୁ ଅପସରି ନଥିବା ବେଳେ ବାଲେଶ୍ୱର ଜିଲା ଅଧୀନ ନୀଳଗିରି ଥାନା ଅଞ୍ଚଳରେ ଥିବା ଏକ ଚର୍ଚ୍ଚରେ କରୋନା ମୁକାବିଲା ପାଇଁ ସାମୂହିକ ପ୍ରାର୍ଥନା କରାଯିବା ଘଟଣା ସାଧାରଣରେ ଉଦବେଗ ଭରି ଦେଇଛି। ଚର୍ଚ୍ଚରେ ଧର୍ମସଭା ଚାଲିଥିବା ଖବରପାଇ ନୀଳଗିରି ପୁଲିସ ଧର୍ମଯାଜକଙ୍କ ସମେତ ୩ଜଣଙ୍କୁ ଉଠାଇ ଆଣି ରବିବାର କୋର୍ଟଚାଲାଣ କରିଛି।

ପ୍ରାର୍ଥନା ଜରିଆରେ କରୋନା ମୁକାବିଲା କରାଯାଇପାରିବ ବୋଲି ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଶ୍ରଦ୍ଧାଳୁମାନେ ନୀଳଗିରି-କପ୍ତିପଦା ପୂର୍ତ୍ତରାସ୍ତାର ଭାଲୁକାଶୁଣି ଛକ ନିକଟରେ ଥିବା ଚର୍ଚ୍ଚରେ ସାମୂହିକ ପ୍ରାର୍ଥନା କରୁଥିବା ଅଭିଯୋଗ ହୋଇଥିଲା। ଖବରପାଇ ନୀଳଗିରି ଆଇଆଇସି ମିନତି ବିଶ୍ୱାଳଙ୍କ ନିର୍ଦେଶକ୍ରମେ ଏଏସଆଇ ଶରତ ଚନ୍ଦ୍ର ଧଳ ସଦଳବଳେ ସେଠାରେ ପହଞ୍ଚି ୩ଜଣଙ୍କୁ ଉଠାଇ ଆଣିଥିଲେ ଏବଂ ଅନ୍ୟମାନଙ୍କୁ ସଚେତନ କରାଇ ସେଠାରୁ ବିଦା କରିଥିଲେ। ପୁଲିସ ପକ୍ଷରୁ ଥାନାରେ ଅଟକ ରଖାଯାଇଥିବା ଧର୍ମଯାଜକ ତଥା ଭାଲୁକାଶୁଣି ଗାଁର ବଣୁ ସିଂ (୬୦), ବରହମପୁର ଥାନା ଅଧୀନ ଚନ୍ଦ୍ରପୁର ଗାଁର ଯୋଗେନ୍ଦ୍ର ସିଂ (୪୦) ଓ ମୟୂରଭଞ୍ଜ ଜିଲା ଆରପଟା ଗାଁର ଶାନ୍ତନୁ ସିଂ (୨୬)ଙ୍କୁ ଜେରା କରି ବୟାନ ରେକର୍ଡ଼ କରାଯିବା ପରେ ସେମାନଙ୍କୁ କୋର୍ଟଚାଲାଣ କରାଯାଇଛି।