ଖୁଣ୍ଟା: ଖୁଣ୍ଟା ଥାନା ବାଙ୍ଗରା ଗ୍ରାମ ପଞ୍ଚାୟତର ସାତଖାଣିଆ ଗ୍ରାମରେ ନିଜର ଜନ୍ମ କଲା ମା’କୁ ଠେଙ୍ଗାରେ ପିଟି ମାରି ଦେଇଥିବା ଅଭିଯୋଗରେ ପୁଅକୁ ପୁଲିସ ଗିରଫ କରିଛି। ମୃତ୍ୟୁ ବରଣ କରିଥିବା ମହିଳା ଜଣଙ୍କ ସାତଖାଣିଆ ଗ୍ରାମର କାପୁରା ସୋରେନ(୪୬) ଓ ଗିରଫ ଅଭିଯୁକ୍ତ ହେଉଛି ମୃତ ମହିଳାଙ୍କର ସାନ ପୁଅ ଫଗ(୨୫)। କାପୁରାଙ୍କ ଭାଇ ସନାତନପୁର ଗ୍ରାମର ମକରା ମାରାଣ୍ଡିଙ୍କ ଅଭିଯୋଗ ଅନୁସାରେ ମଙ୍ଗଳବାର ରାତିରେ ଫଗ ମାମୁ ଘରକୁ ଯାଇଥିଲା ଓ ମାଆକୁ ମାଡ଼ ମାରିବାରୁ ସେ ମରିଯାଇଛି ବୋଲି କହିଥିଲା।
ମକରା ସମସ୍ତ ବିଷୟରେ ଅବଗତ ହେବା ପରେ ଭଉଣୀ କାପୁରାକୁ ଭଣଜା ଫଗ ଠେଙ୍ଗାରେ ପିଟି ମାରି ଦେଇଥିବା ବୁଧବାର ପୁଲିସ ନିକଟରେ ଅଭିଯୋଗ କରିଥିଲେ। ସନ୍ଧ୍ୟାରେ ଆଇଆଇସି ସ୍ବର୍ଣ୍ଣଲତା ମିଞ୍ଜ ଓ ଅନ୍ୟ ଅଧିକାରୀ ମାନେ ଘଟଣା ସ୍ଥଳରେ ପହଞ୍ଚି ଥିଲେ। ମୃତ ଦେହ ଓ ଠେଙ୍ଗା ଜବତ କରିବା ସହ ପ୍ରାରମ୍ଭିକ ତଦନ୍ତ ପରେ ପୁଲିସ ଏକ ହତ୍ୟା ମାମଲା ରୁଜୁ କରି ଫଗକୁ ଗିରଫ କରିଛି। ତେବେ କେଉଁ ନିର୍ଦିଷ୍ଟ କାରଣ ପାଇଁ ଉକ୍ତ ଘଟଣା ଘଟିଲା ତାହା ସ୍ପଷ୍ଟ ହୋଇନି। ତଦନ୍ତ ଜାରି ରହିଛି।
