ନୂଆଦିଲ୍ଲୀ: ମହାମାରୀ କରୋନା ଭୂତାଣୁର ମୁକାବିଲା ଲାଗି ବିଭିନ୍ନ ଦେଶର ସରକାର ନିଜର ପ୍ରୟାସ ଜାରି ରଖିଥିବାବେଳେ ଏହି ସମୟରେ ମହିଳା ଓ ଝିଅମାନଙ୍କ ପ୍ରତି ବିଶେଷ ଧ୍ୟାନ ଦିଆଯାଉ ବୋଲି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ କହିଛନ୍ତି।
ସେ ଆଶଙ୍କା କରି କହିଛନ୍ତି, ଲିଙ୍ଗଗତ ସମାନତା ଏବଂ ମହିଳାମାନଙ୍କ ଅଧିକାରଗୁଡ଼ିକର ରକ୍ଷା କରିବା ଦିଗରେ ଗତ କିଛି ଦଶନ୍ଧି ହେବ ଯେଉଁ ଅଳ୍ପବହୁତ ପ୍ରଗତି ଘଟିଛି, ତାହା ଏହି ମହାମାରୀ କାରଣରୁ ବିପଦରେ ପଡ଼ିଛି। ତେଣୁ ମୁଁ ସରକାରମାନଙ୍କୁ ଅନୁରୋଧ କରୁଛି ଯେ, ସରକାରମାନେ ଯେଉଁ ପଦକ୍ଷେପ ନେଉଛନ୍ତି ସେସବୁ ମହିଳାମାନଙ୍କୁ ଦୃଷ୍ଟିରେ ରଖି ନିଅନ୍ତୁ। କ୍ୟାଶ୍ ଟ୍ରାନ୍ସଫରଠାରୁ ଆରମ୍ଭ କରି କ୍ରେଡିଟ ଏବଂ ଲୋନ ପର୍ଯ୍ୟନ୍ତ, ଅର୍ଥବ୍ୟବସ୍ଥାକୁ ରକ୍ଷା କରିବା ଏବଂ ପ୍ରୋତ୍ସାହିତ କରିବାର ଉପାୟ, ସେସବୁ ମହିଳାମାନଙ୍କୁ ଲକ୍ଷ୍ୟରେ ରଖି ହେବା ଉଚିତ। ଏହି ନୂଆ ରୋଗ କିପରି ପୂର୍ବରୁ ରହିଥିବା ଅସମାନତାଗୁଡ଼ିକୁ ଆହୁରି ଗଭୀର କରୁଛି, ଯେଉଁଥିରେ ମହିଳା ଓ ଝିଅମାନଙ୍କ ଜୀବନ ପ୍ରଭାବିତ ହେଉଛି ସେ ନେଇ ଜାତିସଂଘ ମହାସଚିବ ବିଭିନ୍ନ ଦେଶର ସରକାରଙ୍କୁ ଚେତାଇଛନ୍ତି।
