ଲକ୍‌ଡାଉନ ନିୟମ ଉଲ୍ଲଂଘନ କଲେ ଦେଖିବା ମାତ୍ରେ ଗୁଳି ନିର୍ଦେଶ ଦିଆଯିବ: କେସିଆର

ହାଇଦ୍ରାବାଦ: ସାରା ଦେଶକୁ ଲକ୍‌ଡାଉନ କରାଯାଇଛି। ଘରୁ ନ ବାହାରିବା ଲାଗି ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ମୁଖ୍ୟମନ୍ତ୍ରୀମାନେ ଜନତାଙ୍କୁ ହାତ ଯୋଡ଼ି ନିବେଦନ କରିଛନ୍ତି। କିନ୍ତୁ ଜନତା ଏହା ମାନିବାକୁ ନାରାଜ। ଅଧିକାଂଶ ସ୍ଥାନରେ ଲୋକେ ଅନାବଶ୍ୟକ ସ୍ଥଳେ ଘରୁ ବାହାରି ରାସ୍ତାରେ ବୁଲାବୁଲି କରୁଛନ୍ତି। ଏହି କାରଣରୁ ତେଲେଙ୍ଗାନା ସରକାର କଡ଼ା ନିଷ୍ପତ୍ତି ନେବାକୁ ଚେତାବନୀ ଦେଇଛନ୍ତି। ଲୋକେ ଲକଡାଉନ ନିୟମ ଉଲ୍ଲଂଘନ କଲେ ପୁଲିସକୁ ଶୁଟ୍‌ ଆଟ୍‌ ସାଇଟ୍‌ ଅର୍ଥାତ ଦେଖିବା ମାତ୍ରେ ଗୁଳି କରିବାକୁ ନିର୍ଦେଶ ଦିଆଯିବ ବୋଲି ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ କହିଛନ୍ତି।

କେସିଆର କହିଛନ୍ତି, ଯଦି ଲୋକମାନେ ସରକାରଙ୍କ କଥା ନ ଶୁଣିବେ ଏବଂ ଘର ଭିତରେ ନ ରହିବେ, ତେବେ ଆମେ ୨୪ ଘଣ୍ଟିଆ କର୍ଫ୍ୟୁ ଲାଗୁ କରିବାକୁ ବାଧ୍ୟ ହେବୁ। ଲୋକେ ଯଦି ଗଳିକନ୍ଦିରେ ବୁଲାବୁଲି କରିବେ, ତା’ହେଲେ ସେନାର ସହାୟତା ନିଆଯିବ ଏବଂ ଦେଖିବାମାତ୍ରେ ଗୁଳି କରିବାକୁ ନିର୍ଦେଶ ଦିଆଯିବ। ତେଣୁ ଲୋକମାନେ ବାହାରକୁ ନ ଆସନ୍ତୁ ଏବଂ ତଦାରଖ କରୁଥିବା ଅଧିକାରୀଙ୍କ ସହିତ ଯୁକ୍ତିତର୍କ ନ କରନ୍ତୁ ବୋଲି କେସିଆର ଜନତାଙ୍କୁ ନିବେଦନ କରିଛନ୍ତି। ସୂଚନାଯୋଗ୍ୟ, ରାଜ୍ୟରେ ବର୍ତ୍ତମାନ ସୁଦ୍ଧା ୩୯ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି।