ଭୁବନେଶ୍ୱର: ‘ୟୁଥ ଅଫ ସଷ୍ଟେନିବିଲିଟି’ର ଓଡ଼ିଶା ଶାଖା ଓ ଓଡ଼ିଶା ଫୁଟବଲ କ୍ଲବ ସହଯୋଗରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଏକ ମ୍ୟାଚ ପରବର୍ତ୍ତି ସଫେଇ ଅଭିଯାନ ସଫଳତାର ସହ ଆୟୋଜିତ ହୋଇଯାଇଛି। ଓଡ଼ିଶା ଫୁଟବଲ କ୍ଲବ ଓ ଗୋଆ ଫୁଟବଲ କ୍ଲବ ମଧ୍ୟରେ ହୋଇଥିବା ଏକ ମ୍ୟାଚ ପରେ ଏହି ସଫେଇ କରାଯାଇଥିଲା। ଏହି କାର୍ଯ୍ୟକ୍ରମ ଅଧିନରେ ‘ୟୁଥ ଅଫ ସଷ୍ଟେନିବିଲିଟି’ର ପ୍ରାୟ ୨୦ ଯୁବ ସ୍ୱେଚ୍ଛାସେବୀ ତଥା ସଷ୍ଟେନିବିଲିଟି କର୍ମୀ ପଡ଼ିଆ ଓ ଷ୍ଟାଡିୟମରେ ଜମା ହୋଇଥିବା ସିଙ୍ଗଲ ୟୁଜ ପ୍ଲାଷ୍ଟିକ ସଂଗ୍ରହ କରି ସେଗୁଡ଼ିକୁ ସାଜସଜ୍ଜା ଓ ଚାରାରୋପଣ ପାତ୍ର ଆଦି କାର୍ଯ୍ୟରେ ଉପଯୋଗ କରିଛନ୍ତି।
ହ୍ୟୁମାନ ସର୍କଲ ନାମକ ଏକ ସଂଗଠନ ଅଧିନରେ ‘ୟୁଥ ଅଫ ସଷ୍ଟେନିବିଲିଟି’ ନାମକ ଏହି ଅଭିଯାନ ଆରମ୍ଭ କରାଯଇଛି। ଏହାର ଉଦ୍ଦେଶ୍ୟ ହେଲା ଯୁବପିଢିଙ୍କ ଦକ୍ଷତାକୁ ବିକଶିତ କରି ସେମାନଙ୍କ ସ୍ୱପ୍ନ ସାକାର କରିବା। ମାତ୍ର କିଛି ମାସ ମଧ୍ୟରେ ଏହି ଅଭିଯାନ କଳିଙ୍ଗ ଇନଷ୍ଟିଚ୍ୟୁଟ ଅଫ ଇଣ୍ଡଷ୍ଟ୍ରିଆଲ ଟେକନଲୋଜୀ, ଜାତୀୟ ଆଇନ ମହାବିଦ୍ୟାଳୟ,ରେଭେନ୍ସା କଲେଜ ଓ କିଟ ଲ’ ସ୍କୁଲ ଆଦିରେ ନିଜକୁ ସ୍ଥାପନ କରିପାରିଛି। ଏହି ଗ୍ରୁପର ଲକ୍ଷ୍ୟ ହେଲା ରାଜ୍ୟ ଓ ଦେଶରେ ସଷ୍ଟେନିବିଲିଟି ବା ପରିବେଶ ସନ୍ତୁଳନର ବାର୍ତ୍ତା ପ୍ରସାର କରିବା।
ଏହି ଅଭିଯାନ ମାଧ୍ୟମରେ ଆଗକୁ ସ୍କୁଲ ଓ କଲେଜରେ କର୍ମଶାଳାମାନ ଆୟୋଜନ କରି ସିଙ୍ଗଲ ୟୁଜ ପ୍ଲାଷ୍ଟିକର ବିଭିନ୍ନ କାର୍ଯ୍ୟରେ ପୁନଃ ବ୍ୟବହାରକୁ ଉତ୍ସାହିତ କରାଯିବାକୁ ଲକ୍ଷ୍ୟ ରଖାଯାଇଛି। ସମାଜରେ ଏକ ପ୍ରଭାବଶାଳୀ ବାର୍ତ୍ତା ପ୍ରେରଣ କରିବା ଏହାର ଲକ୍ଷ୍ୟ। ଆସନ୍ତା ୧ ବର୍ଷ ମଧ୍ୟରେ ଓଡ଼ିଶାର ସବୁ ଅଞ୍ଚଳରେ ନିଜର ଅଭିଯାନକୁ ସଂପ୍ରସାରଣ କରିବା ସହ ୧୦୦ଟି ଘରେ ସହରି କୃଷି ବ୍ୟବସ୍ଥା ଆରମ୍ଭ କରିବାକୁ ଲକ୍ଷ୍ୟ ରଖାଯାଇଛି।
